Ինչ փոփոխություններ են առաջարկվում «Կուտակային կենսաթոշակների մասին» օրենքում
Գործող օրենքով ՀՀ կառավարության սահմանած ցանկում ներառված հիվանդություններով հիվանդանալու դեպքում` Առողջապահության նախարարության կողմից տրված եզրակացության հիման վրա, մասնակիցն իրավունք ունի ներկայացնելու իր կենսաթոշակային հաշվում առկա միջոցներն ամբողջությամբ ստանալու պահանջ:
Ներկայացնելով «Կուտակային կենսաթոշակների մասին» օրենքում առաջարկվող փոփոխությունները` ասել է ՀՀ առողջապահության նախարարի տեղակալ Արտակ Ջումայանը: Հարցը քննարկվել է Աշխատանքի եւ սոցիալական հարցերի մշտական հանձնաժողովի` փետրվարի 2-ի արտահերթ նիստում:
«Ներկայում, Առողջապահության նախարարությունն է իրականացնում կենսաթոշակային առկա միջոցներն ամբողջությամբ ստանալու պահանջի վերաբերյալ հաշվարկում, շահառուի կողմից ներկայացված դիմումների ուսումնասիրություն: Գործող օրենսդրության համաձայն յուրաքանչյուր դեպքի համար ստեղծվում է մասնագիտական հանձնաժողով, որն իրականացնում է ցանկով ներառված հիվանդությունների եւ քաղաքացու ախտորոշման համապատասխանության կամ անհամապատասխանության որոշման գործառույթ, եւ սահմանված կարգով տրամադրվում է եզրակացություն: Այս գործընթացն առաջացնում է լրացուցիչ փաստաթղթաշրջանառություն եւ նախարարության` որպես քաղաքականություն մշակող մարմնի համար ոչ բնորոշ գործառույթի իրականացում»,- մանրամասնել է Արտակ Ջումայանը: Որոշումն ուժի մեջ է մտել 2015 թվականին: Այս տարիների ընթացքում արձանագրվել է քաղաքացիների դիմելիության զգալի աճ: Ըստ հիմնական զեկուցողի` եթե 2017-2018 թվականներին քաղաքացիների դիմելիության ընդհանուր թիվը եղել է 2, ապա 2023 թվականին դիմել է 43 քաղաքացի: Առաջարկվող փոփոխությամբ նախատեսվում է նշված գործառույթը վերապահել Աշխատանքի եւ սոցիալական հարցերի նախարարության միասնական սոցիալական ծառայությանը: Անձի ֆունկցիոնալության գնահատման իրականացումը, մասնագիտական հիվանդության հետ կապված անձի մասնագիտական աշխատունակության կորստի աստիճանի որոշումը, այդ թվում` մասնագիտական եզրակացության տրամադրման գործառույթը եւս կիրականացնի Միասնական սոցիալական ծառայությունը:
Արտակ Ջումայանը պատասխանել է պատգամավորների հարցերին` անդրադառնալով գործառույթի փոփոխության կարգավորումներին, արդյունավետությանը:
Նախագիծը ստացել է դրական եզրակացություն:
Հանձնաժողովը երկրորդ ընթերցմամբ քննարկել է նաեւ ««Բնակչության բժշկական օգնության եւ սպասարկման մասին» օրենքում փոփոխություն կատարելու մասին» օրենքի նախագիծը` կից օրենսդրական փաթեթով:
Նախագծերի ընդունումը նպատակ ունի խմբագրական փոփոխություններ կատարել մի շարք օրենքներում: Ներկայացված նախագծերով օրենքների ձեւակերպումները համապատասխանեցվում են գործող օրենսդրությանը: Միաժամանակ, զուգահեռներ են տարվում հաշմանդամության խմբերի եւ ֆունկցիոնալության սահմանափակումների միջեւ` հաշմանդամություն ունեցող անձանց իրավունքներն ապահովելու նպատակով:
Հանձնաժողովը դրական եզրակացություն է տվել օրենսդրական փաթեթին:
