Ինչպե՞ս ակտիվացնել ՀՀ արտաքին քաղաքականության տնտեսական բաղադրիչը
Ազգային Ժողովում այսօր վերջապես կայացան «ՀՀ արտաքին քաղաքականության տնտեսական բաղադրիչը» խորագրով խորհրդարանական լսումները, որոնք նախատեսվում էր անցկացնել դեռևս ապրիլի 12-ին, սակայն Ադրբեջանի կողմից սանձազերծված ապրիլյան պատերազմի պատճառով լսումները հետաձգվեցին:
ԱԺ արտաքին հարաբերությունների մշտական հանձնաժողովի նախագահ Արտակ Զաքարյանն իր խոսքում հիշեցրեց, որ լսումները պայմանավորված են ՀՀ նախագահի կողմից ներկայացված նախաձեռնությամբ, որը վերաբերում է արտաքին քաղաքականության առաջնահերթություններում հատկապես տնտեսական հարարաբերությունների օրակարգերի ակտիվացմանը, պետական հաստատությունների և դիվանագիտական ծառայությունների առջև բարեկամ պետությունների հետ երկկողմ և բազմակողմ հարաբերություններում առկա տնտեսական պոտենցիալի հայտնաբերման խնդիրների առաջադրմանը: Հանձնաժողովի նախագահն ընդգծեց, որ այս նախաձեռնությունը բազմակողմանի դրական արձագանք է ստացել թե՛ Սփյուռքի, թե՛ պետական կառույցների, թե՛ գործարար ոլորտի կողմից :
Արտաքին աշխարհի հետ տնտեսական կապերը ակտիվացնելու գործում դիվանագիտական կորպուսի և աշխարհով մեկ սփռված ՀՀ դեսպանությունների ջանքերը ակտիվացնելու կարևորության մասին խոսեց ՀՀ վարչապետ Կարեն Կարապետյանը:
«Հայաստանի դիվանագիտական կորպուսն անհամեմատ ավելի մեծ ջանքեր պետք է գործադրի արտաքին քաղաքականության տնտեսական բացադրիչի ընդլայնման համար, քանի որ այն տնտեսության զարգացման հրամայականներից է: Մինչդեռ այդ դաշտում եղել են բացթողումներ»,- հայտարարեց նա:
Վարչապետի խոսքով, արտաքին քաղաքականությունը մշտապես ուղղված է եղել ՀՀ անվտանգության ապահովմանը, տնտեսական զարգացման համար նպաստավոր պայմանների ստեղծմանը, ինչպես նաև միջազգային կազմակերպություններում Հայաստանի ինտեգրման գործընթացի ընդլայնմանն ու համագործակցության վստահելի մթնոլորտի ձևավորմանը: Ըստ այդմ էլ՝ դիվանագիտական կորպուսը, նրա խոսքով, պետք է գործուն միջոցառումներ իրականացնի Հայաստանի` որպես գործարարությամբ զբաղվելու և ներդրումներ իրականացնելու հուսալի գործընկերոջ իմիջի ձևավորման ուղղությամբ, տնտեսական համագործակցության ուղղությամբ:
«Տնտեսվարողների համար դիվանագիտական կորպուսը պետք է լինի հարթակ, որտեղ նրանց կաջակցեն ամենատարբեր հարցերով: Արտաքին քաղաքական դաշտի տնտեսական բաղադրիչի ակտիվացման հետ կապված պետությունը շատ անելիքներ ունի, քանզի եղել են բացթողումներ: Այդ դեպքում, թեև Հայաստանը փոքր շուկա ունի, բայց կկարողանա իր տեղը գտնել»,- հավելեց Կարեն Կարապետյանը՝ հորդորելով այդ գործընթացում ակտիվացնել ջանքերը նաև ՀՀ դեսպանություններին:
«Ֆրիդրիխ Էբերտ» հիմնադրամի Հարավային Կովկասի գրասենյակի ղեկավար Յուլիա Բրեզիուսը իր ելույթում անդրադարձավ Հայաստանի մեկուսացմանը տարածաշրջանային հարևանների ջանքերի շնորհիվ: Նրա խոսքով, Թուրքիայի և Ադրբեջանի հետ հակամարտությունները շարունակում են մեկուսացնել Հայաստանը տնտեսական հնարավորությունների առումով և միայն Վրաստանն ու Իրանն են, որ բաց են Հայաստանի համար: Մատնանշելով, որ տնտեսական աճը դանդաղում է, իսկ արտաքին ներդրումները նվազում, Յուլիա Բրեզիուսը հայտարարեց, որ նման բարդ պայմաններում Հայաստանը նաև հնարավորություններ ունի, որոնք ընձեռում է ԵԱՏՄ-ին անդամակցությունը: Մասնավորապես, Հայաստանը հնարավորություն ունի մուտք գործելու ԵԱՏՄ 180 միլիոնանոց շուկա, ինչպես նաև շարունակում է բանակցությունները ԵՄ հետ շրջանակային համաձայնագրի շուրջ.
«Եթե այդ համաձայնագիրը ստորագրվի, ապա նորանոր հնարավորություններ կստեղծվեն ոչ միայն Հայաստանի տնտեսության համար, այլև այն կարող է դառնալ օրինակելի մոդել ամբողջ տարածաշրջանի համար: Հայաստանը, մասնավորապես, կարող է դառնալ առաջին պետությունը, որը միաժամանակ ունի սերտ կապեր և՛ Ռուսաստանի, և՛ ԵՄ հետ: Պարտադիր չէ «կամ-կամ» սկզբունքով ընտրության առաջ կանգնել»,- նշեց նա:
Վերադառնալով Իրանին, նա նաև ընդգծեց Հայաստանի համար այդ երկրի հետ լավ հարաբերությունների կարևորությունը , քանզի պատժամիջոցների վերացումից հետո Իրանը կարևոր գործոն է դարձել տարածաշրջանում: Իսկ դա նշանակում է, որ Հայաստանը կարող է տնտեսական օգուտներ քաղել որպես տարանցիկ երկիր:
