Ադրբեջանի հետ ոչ միայն հնարավոր չէ խաղաղ գոյակցություն, այլ որևէ զիջում. Վարդան Ոսկանյան

Տեղաբնիկ մի քանի ժողովուրդների բնօրրանների ապօրինի բռնազավթման, նրանց հանդեպ ցեղասպանության, ուծացման և «ադրբեջանականացման», տարածքի կովկասյան, հայկական և իրանական պատմության ու մշակույթի աղճատման և յուրացման քաղաքականությամբ և օսմանյան սվիններով միայն 1918թ. առաջին անգամ պատմության ասպարեզ մուտք գործած արհեստածին Ադրբեջանը չի կարող ունենալ ոչ միայն տարածքային ամբողջականություն, այլ նաև գոյության իրավունք։ Այս մասին գրել է իրանագետ Վարդան Ոսկանյանը:

Նա նաեւ նշել է. «Հարավային Կովկասի մարմնի վրա, ցավալիորեն, գոյացած քաղցկեղային այս պալարը խաթարել և խաթարում է մեր տարածաշրջանի ոչ միայն բնականոն քաղաքական ու քաղաքակրթական զարգացումը, այլ նաև ագրեսիայի, ծավալապաշտության և մարդատյացության մշտական աղբյուր է իր ամբողջովին բարբարոսական բնույթով ու վարչախմբով, ուստի դրա հետ ոչ միայն հնարավոր չէ խաղաղ գոյակցություն, այլ որևէ զիջում, քանզի դա դուռ է բացելու նոր ցեղասպանության և վայրագությունների»։

Ավելի վաղ Արցախի խորհրդարանը կոչ էր արել բոլոր հայերին թույլ չտալ, որ Հայաստանի իշխանությունները հանձնեն Ղարաբաղը: Արցախի օրենսդիր մարմինն այսպես է արձագանքել ՀՀ վարչապետ Նիկոլ Փաշինյանի մայիսի 22-ի հայտարարությանը, որով նա վերահաստատել է Արցախը Ադրբեջանի կազմում ընդգրկելու իր պատրաստակամությունը, և որը մեծ վրդովմունք ու զայրույթ է առաջացրել Արցախի Հանրապետությունում: