Ղրղզստանի նախագահը կոչ է արել ՀՀ-ին և Ադրբեջանին հակամարտությունը լուծել խաղաղ ճանապարհով

Ղրղզստանի նախագահ Սադիր Ժապարովը կոչ է արել Հայաստանին և Ադրբեջանին հակամարտությունը լուծել խաղաղ ճանապարհով։

Երկրի ղեկավարի մամուլի ծառայությունից հայտնում են, որ նախօրեին Ժապարովը մասնակցել է Հավաքական անվտանգության պայմանագրի կազմակերպության (ՀԱՊԿ) Հավաքական անվտանգության խորհրդի արտահերթ նիստին՝ տեսակոնֆերանսի ձևով, որը տեղի է ունեցել Հայաստանի նախաձեռնությամբ ու նվիրված  էր հայ-ադրբեջանական սահմանին տիրող իրավիճակին:

Նա, մասնավորապես, նշել է, որ Ղրղզստանը չափազանց անհանգստացած է երկու բարեկամ պետությունների սահմանին իրավիճակի սրմամբ, և ընդգծել է իրավիճակը բացառապես քաղաքական և դիվանագիտական ​​ճանապարհով լուծելու անհրաժեշտությունը։ Ժապարովը նաև հույս է հայտնել, որ երկու կողմերը կշարունակեն զերծ մնալ ուժի կիրառումից և կլուծեն իրենց միջև առկա բոլոր տարաձայնությունները խաղաղ ճանապարհով՝ ամրապնդելով Հայաստանի և Ադրբեջանի միջև վստահության միջոցները։