Բելառուսն առաջարկել Է ՀԱՊԿ գլխավոր քարտուղարին ուղարկել հայ-ադրբեջանական սահման

Բելառուսը Հավաքական անվտանգության պայմանագրի կազմակերպության նիստում առաջարկել է օպերատիվ քայլեր ձեռնարկել հայ-ադրբեջանական սահմանին իրավիճակի կարգավորման համար, այդ թվում՝ ՀԱՊԿ գլխավոր քարտուղարի մեկնումը սահման եւ իրավիճակի վերլուծության համար աշխատանքային խմբի ստեղծումը, հաղորդում է Բելտա գործակալությունը:

ՀԱՊԿ Հավաքական անվտանգության խորհրդի առցանց նիստը կայացել է հայ-ադրբեջանական սահմանին իրավիճակի սրման կապակցությամբ Հայաստանին ուղղված ուղերձով: Բելառուսի դիրքորոշումը խորհրդի անդամներին հասցրել է երկրի անվտանգության խորհրդի պետքարտուղար Ալեքսանդր Վոլֆովիչը։

"Առաջարկվել են քայլեր, որոնք հնարավոր կլինի ձեռնարկել օպերատիվ կարգով։ Դրանց թվում է ՀԱՊԿ գլխավոր քարտուղարի այցը հակամարտության գոտի՝ պետությունների ղեկավարներին մանրամասն զեկույց պատրաստելու համար եւ ՀԱՊԿ քարտուղարության եւ Միացյալ շտաբի աշխատակիցների թվից աշխատանքային խմբի ստեղծումը ՝ իրավիճակի վերլուծության եւ առաջարկությունների մշակման համար", - ասված է հաղորդագրության մեջ:

Սեպտեմբերի 13-ի վաղ առավոտյան իրադրությունը հայ-ադրբեջանական սահմանին կտրուկ սրվել է ։ ՀՀ պաշտպանության նախարարության հաղորդագրության համաձայն, Ադրբեջանը լայնածավալ ռազմական հարձակում է սկսել Հայաստանի հետ սահմանի միանգամից մի քանի հատվածներում: Կան զոհեր և վիրավորներ հայ զինծառայողների և խաղաղ բնակիչների շրջանում։ Հայաստանի վարչապետ Փաշինյանը, ելույթ ունենալով խորհրդարանում, հայտնել է հայկական կողմից առնվազն 49 զոհի մասին:

Երեւանը քննարկել է ԵԱՀԿ Մինսկի խմբի անդամ երկրների հետ սահմանին տիրող իրավիճակը: Հայաստանի իշխանությունները որոշել են դիմել Ռուսաստանի Դաշնությանը, ՀԱՊԿ-ին եւ ՄԱԿ-ի ԱԽ-ին։