Ադրբեջանը լուծել է ղարաբաղյան հակամարտությունը և ԵԱՀԿ Մինսկի խմբի կարիքն այլևս չկա. Ալիև

Ադրբեջանը լուծել է ղարաբաղյան հակամարտությունը և ԵԱՀԿ Մինսկի խմբի կարիքն այլևս չկա։ Այս մասին հայտարարել է Ադրբեջանի նախագահ Իլհամ Ալիեւը Բաքվի IX գլոբալ ֆորումի բացմանը, փոխանցում են ադրբեջանական լրատվամիջոցները։


Նրա խոսքով՝ ԵԱՀԿ-ից մանդատ ստանալով՝ 28 տարվա ընթացքում ԵԱՀԿ ՄԽ միջնորդները ոչ մի արդյունքի չեն հասել։ «Ուստի, այն բանից հետո, երբ Ադրբեջանը կարգավորեց ղարաբաղյան հակամարտությունը, Մինսկի խումբն այլևս պետք չէ», - հայտարարել է Ալիևը:


Նա հավելել է, որ «ռուս-ուկրաինական պատերազմից հետո բոլորը հասկանում են, որ անհնար է հանդիպում անցկացնել Մինսկի խմբի բոլոր երեք համանախագահների մասնակցությամբ»: «Մեզ արդեն տեղեկացրել են, որ Մինսկի խմբի համանախագահների ինստիտուտն այլևս չի գործելու։ Նրանց արդեն թոշակի անցնելու ժամանակն է։ Այսպիսով, ես ուզում եմ հայտնել մեր դիրքորոշումը, որ Հայաստանում Մինսկի խմբի կամ որևէ այլ երկրի հետ կապված ցանկացած սպեկուլյացիա Ադրբեջանում միայն գրգռում է առաջացնում։ Մենք կարգավորել ենք հակամարտությունը։ Մինսկի խմբի մշակած Մադրիդյան սկզբունքներն իրագործվել են։ Այժմ մենք պետք է մտածենք Հայաստանի հետ հարաբերությունների կարգավորման ուղիների մասին, ստորագրենք խաղաղության պայմանագիր», - ընդգծել է Ալիեւը։


Ադրբեջանի նախագահը նաեւ հայտարարել է, որ այժմ ժամանակն է մտածել Հայաստանի հետ հարաբերությունների կարգավորման եւ խաղաղ պայմանագրի ստորագրման ուղիների մասին: «Մենք ստեղծել ենք խաղաղության համաձայնագրի մշակման հանձնաժողով եւ նույնը ակնկալում ենք Հայաստանից», - նշել է նա:


Ալիևը նաև նշել է, որ եթե Հայաստանը կասկածի տակ դնի Ադրբեջանի տարածքային ամբողջականությունը, ապա Ադրբեջանը նման քայլեր կանի իր տարածքի նկատմամբ: «Այդ պատճառով, եթե Հայաստանը Ղարաբաղի հայերի համար կարգավիճակ պահանջի, ինչու ադրբեջանցիները չպետք է արեւմտյան Զանգեզուրում ադրբեջանցիների համար կարգավիճակ պահանջեն։ Քանի որ այդ տարածքն ամբողջությամբ բնակեցված էր ադրբեջանցիներով», - հայտարարել է Ալիեւը։


Նրա խոսքով՝ այդ ճանապարհը տանում է փակուղի։ «Ես կարծում եմ, որ հայկական կառավարությունը չպետք է մոռանա Ղարաբաղյան երկրորդ պատերազմի դասերը, լավ սերտի այդ դասերը եւ հրաժարվի Ադրբեջանի հանդեպ ցանկացած տարածքային պահանջից», - հավելել է նա:


 

Տպել

Թեմայի այլ նորություններ
Загрузка...