Ադրբեջանի հետ «միջանցքային տրամաբանության» որոշումներ չեն քննարկվում. Հարությունյան

Հայաստանն ու Ադրբեջանը «միջանցքային տրամաբանության մեջ» ոչ մի որոշում, անկլավների ոչ մի հարց չեն քննարկում։ Այս մասին այսօր՝ հունիսի 2-ին, խորհրդարանում հայտարարեց Հայաստանի վարչապետի աշխատակազմի ղեկավար Արայիկ Հարությունյանը։

Նա նշեց, որ հայկական կողմը վարչապետի, արտաքին գործերի նախարարի և պատգամավորների մակարդակով բազմիցս հայտարարել է, որ «միջանցքային տրամաբանության մեջ» քննարկումներ չկան։ Լրագրողների նկատառմանը, որ ադրբեջանական կողմը՝ ի դեմս նախագահի, հակառակն է պնդում, Հարությունյանը նշեց.

«Ցանկացած կողմ, ելնելով սեփական PR-ից, կարող է որոշակի հայտարարություններ անել։ Բայց ես զարմացած եմ, որ չնայած վարչապետի, ԱԳՆ-ի և պատգամավորների հակառակ հայտարարություններին, Ալիևի յուրաքանչյուր հայտարարություն տեղեկատվական դաշտում հանգեցնում է հիստերիայի և հայտարարությունների, թե «երկիրը ծախվել է», «համաձայնվել է արտատարածքային որոշումների» և այսպես շարունակ։ Եկեք հարգենք ինքներս մեզ»:

Մեկնաբանելով այն հարցին, թե, այնուամենայնիվ, Ադրբեջանը միջանցք տրամադրելու պահանջ է հնչեցնում, Հարությունյանը նշեց` Բանակցությունների խնդիրն է հասնել լավագույն տարբերակին, քանի որ բանակցություններն ինքնին ենթադրում են փոխզիջումային լուծումների ձեռքբերում։

Ի՞նչ է պատրաստ Հայաստանը զիջել, հետաքրքրվեցին լրագրողները։ «Փոխզիջումները կախված են առկա մթնոլորտից և բանակցությունների օրակարգից։ Կողմը կարող է գնալ բանակցությունների՝ մեծ զիջումների գնալու պատրաստակամությամբ, բայց իրավիճակն այնպիսին լինի, որ հարցը լուծվի փոքր փոխզիջումների միջոցով»։

Ստեղծված պայմաններում, ընդգծել է Հարությունյանը, կոնկրետ փոխզիջումներ հնչեցնելը, որոնց պատրաստ է հայկական կողմը, մեծ սխալ կլինի։ «Դա կնշանակի ամբողջությամբ «բացել խաղաքարտերը»: Սա էապես կթուլացնի մեր դիրքերը բանակցություններում։ Դուք դա ուզու՞մ եք»։ – վրդովվեց վարչապետի աշխատակազմի ղեկավարը: