Հրթիռները պիտանի էին. Տոնոյանի պաշտպանները հայտարարում են ապացույցներ ձեռք բերելու մասին

Պաշտպանության նախկին նախարար Դավիթ Տոնոյանի փաստաբանական խումբը հայտարարություն է տարածել՝ տեղեկացնելով, որ «իրավասու պետական մարմնից անհերքելի ապացույցներ է ստացել, որոնք փաստում են խնդրո առարկա հրթիռների ձեռքբերման ժամանակ դրանց շահագործման ժամկետների մեջ լինելը»։


«Առաջադրված մեղադրանքի համաձայն՝ Դավիթ Տոնոյանը, 2010-2016 թվականներին զբաղեցնելով ՀՀ պաշտպանության նախարարի առաջին տեղակալի պաշտոնը և այդ պաշտոնի բերումով տեղեկացված լինելով մատակարարման պահին հիշյալ հրթիռների օրացույցային ժամկետներն անցած լինելու մասին, ձեռնամուխ է եղել այդ՝ պիտանելիության ժամկետները սպառված և տեխնիկական բնութագրին անհամապատասխան հրթիռների ձեռքբերմանը: Մինչդեռ, ինչպես արդեն նշվեց, մի քանի պաշտոնական աղբյուրներից, այդ թվում՝ ներպետական իրավասու մարմնից ստացված պաշտոնական գրությամբ հաստատվել է, որ հիշյալ հրթիռների պիտանելիության ժամկետները սպառված չեն եղել, ավելին՝ հրթիռներն անգամ համապատասխանել են տեխնիկական բոլոր նորմերին»,- ասված է հայտարարությունում։


Փաստաբանական խումբը հայտնում է, որ դատարանում ներկայացնելուց հետո նշված փաստաթղթերը կհրապարակվեն։


VERELQ-ը հիշեցնում է, որ ՀՀ պաշտպանության նախկին նախարար Դավիթ Տոնոյանը և զենքի մատակարարումներով զբաղվող գործարար Դավիթ Գալստյանը ձերբակալվել են ՀՀ ԱԱԾ-ում քննվող քրեական գործի շրջանակներում:


Ըստ ԱԱԾ հաղորդագրության՝ Դավիթ Տոնոյանը և Դավիթ Գալստյանը ներգրավվել են որպես 2,2 մլրդ դրամ հափշտակելու, կեղծիք կատարելու և հանրության համար վտանգավոր արարքներ կատարելու մեջ:


Քրեական գործի շրջանակներում ձերբակալվել, այնուհետև կալանավորվել է ՀՀ ԶՈՒ գլխավոր շտաբի պետի տեղակալ Ստեփան Գալստյանը: Նա մեղադրվում է պաշտոնեական լիազորությունները չարաշահելու, նյութական ծանր հետեւանքներ առաջացնող եւ կեղծիք կատարելու մեջ։

Տպել

Թեմայի այլ նորություններ
Загрузка...