ՀՅԴ 34-րդ Ընդհանուր ժողովն ավարտեց իր աշխատանքները. ընտրվել է նոր Բյուրո

ՀՅԴ 34-րդ Ընդհանուր ժողովն ավարտել է իր աշխատանքները, որի ժամանակ ընտրել է նոր Բյուրո: Այս մասին տեղեկացնում է ՀՅԴ Հանրային կապերի գրասենյակը:

Տարածված հաղորդագրության մեջ, մասնավորապես, ասվում է. «2022 թ. մարտի 8-ին, Հայաստանում գումարված ՀՅԴ 34-րդ Ընդհանուր Ժողովն ավարտեց իր աշխատանքները. այն մեկնարկել էր փետրվարի 28-ին։ Ժողովի օրակարգը բխում էր հայրենիքի և հայության առջև ծառացած ներազգային, միջազգային և տարածաշրջանային մարտահրավերներից, որոնց շուրջ ծավալվեցին խորքային քննարկումներ. ճշտվեցին հաջորդ քառամյակի ՀՅԴ քաղաքական ուղեգիծն ու ռազմավարությունը և կայացվեցին որոշումներ Հայ դատի, արտաքին և ներազգային ուղղություններով աշխատանքների, քարոզչական և տնտեսական քաղաքականության վերաբերյալ:

Ժողովը քննեց և գնահատեց շրջանավարտ ՀՅԴ Բյուրոյի եռամյա գործունեությունը, ներկազմակերպական խնդիրներն ու անելիքները:

Ընդհանուր ժողովն իր օրակարգը սպառելուց հետո, ընտրեց կուսակցության բարձրագույն մարմին՝ Բյուրո:

ՀՅԴ Բյուրոն իր անդրանիկ նիստում ՀՅԴ Բյուրոյի ներկայացուցիչ ընտրեց Հակոբ Տեր-Խաչատուրյանին։

ՀՅԴ նորընտիր Բյուրոյի անդամներն են՝

Վիգեն Բաղումյան (Իրան)

Դավիթ Իշխանյան (Արցախ)

Արսեն Համբարձումյան (Հայաստան)

Կիրո Մանոյան (Հայաստան)

Մկրտիչ Մկրտիչյան (Լիբանան)

Խաժակ Մկրտիչյան (Ամերիկայի Միացյալ Նահանգներ)

Արմեն Ռուստամյան (Հայաստան)

Հովսեփ Տեր-Գևորգյան (Եվրոպա)

Րաֆֆի Տոնապետյան (Կանադա)

Մուրադ Փափազյան (Եվրոպա):