Միրզոյան. TRIPP երթուղով զենքի և ռազմամթերքի փոխադրումն արգելված կլինի

TRIPP երթուղով զենքի, ռազմամթերքի և վտանգավոր բեռների որոշ այլ կատեգորիաների փոխադրումն արգելված կլինի։ Հոկտեմբերի 21-ին այս մասին հայտարարեց Հայաստանի արտաքին գործերի նախարար Արարատ Միրզոյանը՝ Արտաքին հարաբերությունների խորհրդարանական հանձնաժողովի նիստում ներկայացնելով նախաձեռնության իրականացման համաձայնագրի նախագիծը։

ԱԳՆ ղեկավարի խոսքով՝ նախատեսված է բեռների ցանկ, որոնց տեղափոխումն այդ երթուղով չի թույլատրվելու։ Խոսքը, մասնավորապես, զենքի, ռազմամթերքի և վտանգավոր քիմիական նյութերի մասին է։

«Այդ ցուցակները շատ երկրներում հայտնի են։ Ադրբեջանի հետ նույնպես կա փոխըմբռնում, որ չի կարելի փոխադրել արգելված իրեր, օրինակ՝ զենք կամ ռազմամթերք, վտանգավոր քիմիական բեռներ և այլն», — նշեց Միրզոյանը։

Նախարարը հավելեց, որ ապրանքների առանձին կատեգորիաների փոխադրման համար անհրաժեշտ կլինի նախապես թույլտվություն ստանալ։

Քննարկման արդյունքներով՝ Արտաքին հարաբերությունների խորհրդարանական հանձնաժողովը հավանություն տվեց նախագծին և այն ընդգրկեց Հայաստանի Ազգային ժողովի առաջիկա նիստի օրակարգում։