Հայաստանը ժամանակի ընթացքում կարող է փոխել մոտեցումը ՀԱՊԿ անդամակցության հարցում

Հայաստանի ղեկավարությունը ժամանակի ընթացքում կարող է փոխել մոտեցումը Հավաքական անվտանգության պայմանագրի կազմակերպությանը (ՀԱՊԿ) երկրի անդամակցության հարցում։ Այսպիսի կարծիք է հայտնել կազմակերպության գլխավոր քարտուղար Տաալատբեկ Մասադիկովը Մոսկվայում կայացած ճեպազրույցի ժամանակ։

Նրա խոսքով՝ ՀԱՊԿ-ին Հայաստանի հետագա մասնակցության մասին որոշումը պետք է կայացնի հենց Հայաստանի ղեկավարությունը՝ հաշվի առնելով փոփոխվող միջազգային իրադրությունը և սեփական գնահատականները։ «Ժամանակն անցնում է, մարդիկ վերանայում են իրենց դիրքորոշումը, աշխարհում իրավիճակը փոխվում է։ Կարծում եմ, որ հայաստանյան ղեկավարությունը, հայ ժողովուրդն ինքը, թերևս, ճիշտ որոշում կկայացնի՝ մնալ մեր Հավաքական անվտանգության պայմանագրի կազմակերպությունում, թե դուրս գալ», — հայտարարել է Մասադիկովը։

Նա նաև հիշեցրել է, որ, չնայած կազմակերպության գործունեությանը ակտիվ մասնակցության փաստացի դադարեցմանը, իրավաբանորեն Հայաստանը նախկինի պես մնում է նրա անդամը։ Ընդ որում, գլխավոր քարտուղարի խոսքով, Երևանն արդեն երրորդ տարին է, ինչ անդամավճարներ չի փոխանցում ՀԱՊԿ բյուջե։ Միևնույն ժամանակ, Մասադիկովը նշել է Հայաստանի ավանդը կազմակերպության ներսում հարաբերությունների զարգացման և նրա գործունեության մեջ։

Գլխավոր քարտուղարի խոսքով՝ ՀԱՊԿ-ին Հայաստանի հետագա մասնակցությանը վերաբերող հարցերը, այդ թվում՝ կազմակերպության կազմից հնարավոր հեռացումը, անդամ պետությունների ղեկավարների իրավասության տիրույթում են։ Հենց նրանք են որոշելու, թե երբ և ինչ ձևաչափով կարող է քննարկվել այս հարցը։ Այդուհանդերձ, Մասադիկովը չի հստակեցրել՝ արդյոք Հայաստանի անդամակցության թեման կքննարկվի Հավաքական անվտանգության խորհրդի առաջիկա նստաշրջանում, թե ոչ։