Անկարան մտադիր է թռիչքներ բացել Հայաստանի տարբեր շրջանների հետ. «Hürriyet»

Անկարան մտադիր է թռիչքներ բացել Հայաստանի տարբեր շրջանների հետ եւ ընդլայնել առեւտրական կապերը Երեւանի հետ, երեքշաբթի գրում է «Hürriyet» թերթը՝ վկայակոչելով Թուրքիայի նախագահի աշխատակազմում արտաքին քաղաքականության վերաբերյալ փակ քննարկումները, փոխանցում է «ՌԻԱ Նովոստի»-ն:

Ավելի վաղ Թուրքիայի քաղավիացիայի վարչությունը հայտնել էր, որ Թուրքիան եւ Հայաստանը ավիահաղորդակցություն կբացեն փետրվարի 2-ից, չվերթները կիրականացվեն շաբաթական երեք անգամ: Հայկական ավիացիոն իշխանությունները նաեւ թուրքական Pegasus ընկերությանը թույլտվություն են տվել շաբաթական երկու չվերթ իրականացնել նույն երթուղով:

«Որպես առաջին քայլ որոշվել է Հայաստանի հետ ավիահաղորդակցություն բացել։ Այնուհետև օրակարգ է դրվելու դեպի այլ շրջաններ թռիչքների հարցը։ Մասնավորապես, Վանը կարող է վերածվել հայերի համար զբոսաշրջային կենտրոնի։ Միևնույն ժամանակ նախատեսվում է վերականգնել որոշ պատմական կառույցներ, ինչպիսիք են Կարսի մոտ գտնվող կամուրջը և շենքերը, որոնց հայերը մեծ նշանակություն են տալիս։ Հայկական սփյուռքի ճնշումը նվազեցնելու համար միաժամանակ կընդլայնվեն առևտրային կապերը», - գրում է թերթը։

Թուրքիայի եւ Հայաստանի միջեւ բացակայում են դիվանագիտական հարաբերությունները, երկու երկրների միջեւ սահմանը փակ է 1993 թվականից Անկարայի նախաձեռնությամբ։ Երկու երկրների միջեւ բարդ հարաբերությունները մի շարք հանգամանքներ են առաջացրել, մասնավորապես, ղարաբաղյան հարցում Անկարայի կողմից ադրբեջանական դիրքորոշման աջակցության եւ Օսմանյան կայսրությունում 1915 թվականի Հայոց ցեղասպանության միջազգային ճանաչման գործընթացին Թուրքիայի սուր արձագանքի հետ կապված: