Բիզնեսը Եվրասիական տնտեսական միության անդամ երկրներում դեռ չի կարողանում օգտվել բոլոր այն հնարավորություններից, որ ընձեռում է ինտեգրացիոն այս միությունը: Այս մասին VERELQ-ի հետ զրույցում ասաց տնտեսական ինտեգրացիայի հարցերով ՌԴ նախագահի խորհրդական Սերգեյ Գլազյևը: «Բիզնեսը բավականին թույլ է արձագանքում ԵԱՏՄ ընձեռնող հնարավորություններին ու արտոնություններին: Դա, առաջին հերթին, պայմանավորված է ներքին բյուրոկրատական քաշքշուկների, ռուբլու թուլության և ԵԱՏՄ անդամ-պետությունների կողմից տարվող դրամա-վարկային քաղաքականությամբ», - ասաց Սերգեյ Գլազյևը: Նա նշեց, որ ներկայումս նկատելի է միությունում ներքին առևտրաշրջանառության նվազում, որն անհրաժեշտ է կանխել: «Ստեղծված իրավիճակի կարգավորման համար հարկավոր է հստակ ֆինանսա-վարկային քաղաքականություն, մեր տնտեսությունների երկար ու հասանելի վարկային միջոցներով համալրում, որպեսզի դրանք կարողանան արդյունավետ համագործակցել», - նշեց Վլադիմիր Պուտինի խորհրդականը: Պատասխանելով հարցին, Գլազյևը նաև նշեց, որ այս պահին նախատեսվում է ԵԱՏՄ-ում ստեղծել միասնական ֆինանսական տարածք, սակայն ինչ վերաբերում է միասնական արժույթին անցնելու խնդրին, ապա սա, Գլազյևի խոսքով, ապագայի հարց է: Նա մանրամասնել է, որ այդ հարցին հարկ է վերադառնալ 2024 թվականից հետո: «Ներկայումս տարվում են աշխատանքներ միասնական ֆինանսական կենտրոնի ստեղծման ուղղությամբ», - հավելեց նա: Նշենք, որ ՌԴ նախագահի խորհրդականը մասնակցում է Երևանում ընթացող Եվրասիական գործընկերության միջազգային համաժողովի աշխատանքներին: Միջոցառման նպատակն է բարձրացնել ԵԱՏՄ տնտեսական ներուժի մասին իրազեկվածության մակարդակը, նպաստել ազգային և տարածաշրջանային գործնական և ներդրումային հնարավորությունների զարգացմանը, ինչպես նաև կայացնել բիզնես շրջանակների երկկողմ և բազմակողմ համագործակցություն: