Շատ ցավալի է, երբ սպորտն ու քաղաքականությունը բախվում են: Այսպես է արձագանքել Իռլանդիայի արդարադատության և հավասարության նախարար Չառլի Ֆլենագանը Հայաստանի ազգային հավաքականի և Լոնդոնի «Արսենալի» կիսապաշտպան Հենրիխ Մխիթարյանի՝ Եվրոպայի Լիգայի եզրափակչին չմասնակցելու հարցին: Նա ափսոսանք է հայտնել Բաքվում կայանալիք Եվրոպայի Լիգայի եզրափակչին Հենրիխ Մխիթարյանի չմասնակցելու ակպակցությամբ: «Շատ ցավալի է, երբ սպորտն ու քաղաքականությունը բախվում են, քանի որ Հենրիխ Մխիթարյանը անվտանգության նկատառումներից ելնելով որոշել է չմեկնել Ադրբեջան՝ մասնակցելու Եվրոպայի լիգայի եզրափակչին: ՈւԵՖԱ-ն ավելին պետք է անի վախերը ցրելու և ստեղծված իրավիճակում պաշտպանություն ապահովելու համար», - իր թվիթերյան էջում գրել է իռլանդացի գործիչը: Ավելի վաղ Մխիթարյանի՝ Բաքու չմեկնելու առթիվ իր հիասթափությունն էր հայտնել նաև «Չելսիի» գլխավոր մարզիչ Մաուրիցիո Սարին: ԵԼ եզրափակչին Մխիթարյանի ներկա չգտնվելու շուրջ ստեղծված իրավիճակին են անդրադարձել նաև ֆուտբոլային աշխարհի այլ հայտնի ներկայացուցիչներ:
