Թբիլիսիում 2017 թվականի մայիսին առևանգված ընդդիմադիր լրագրող Աֆղան Մուխթարլիի կնոջ՝ Լեյլա Մուստաֆաեւայի՝ բանտարկված լրագրողի իրավունքների սահմանափակման եւ նրա դեմ հնարավոր սադրանքի մասին հայտարարության կապակցությամբ, լրագրողի փաստաբան Նեյմաթ Քերիմլին օգոստոսի 25-ին փորձել է տեսակցել նրան թիվ16 գաղութում: Սակայն, ինչպես նշում է Contact.az-ը, փաստաբանին եւ նրա հետ գաղութ եկած «Մուսավաթ» կուսակցության ղեկավար Արիֆ Գաջիլիին թույլ չեն տվել հանդիպել լրագրողին՝ պատճառաբանելով, թե ոչ աշխատանքային օր է: Փաստաբանը պաշտպանյալի հետ հանդիպման մերժումը ոչ օրինաչափ է անվանել, քանի որ, նրա խոսքով, փաստաբանն իրավունք ունի ցանկացած պահի իր պաշտպանյալի հետ առանձին հանդիպել ազատազրկման վայրում: «Այս մերժումը ավելի է սաստկացրել մեր մտահոգությունը Աֆղան Մուխթարլիի մասին՝ նրա դեմ հնարավոր սադրանքների հետ կապված», - ասել է Քերիմլին: Հիշեցնենք, հետաքննող լրագրող Մուխթարլիին առեւանգել էին Թբիլիսիում 2017-ի մայիսին եւ գաղտնի տեղափոխվել Ադրբեջան, որտեղ նրան մեղադրում են մաքսանենգության, սահմանի ապօրինի հատման, սահմանապահի դեմ բռնություն գործադրելու մեջ: Մուխթարլին դատապարտվել է 6 տարվա ազատազրկման: Մուխթարլիի ձերբակալությունը դատապարտել են Եվրախորհրդարանը, մարդու իրավունքների միջազգային կազմակերպությունները: Amnesty International-ը նրան ճանաչել է «խղճի բանտարկյալ»:
