ՀՀԿ ԳՄ-ում Կարեն Կարապետյանի՝ Հանրապետական կուսակցության անդամ դառնալու հարց չի քննարկվել: Այս մասին ԳՄ նիստից հետո լրագրողներին ասաց կուսակցության խոսնակ, ԱԺ փոխնախագահ Էդուարդ Շարմազանովը՝ այդպես էլ չհստակեցնելով՝ արդյո՞ք Կարեն Կարապետյանը դիմում գրել է ՀՀԿ-ին անդամակցելու համար, թե ոչ: Հիշեցնենք, ըստ մամուլի՝ վարչապետը նոյեմբերի 26-ին կայանալիք ՀՀԿ համագումարում կհամալրի կուսակցության շարքերը, ինչպես նաև կզբաղեցնի ՀՀԿ փոխնախագահի պաշտոնը: Ըստ Շարմազանովի՝ երբ ժամանակը գա՝ նախագահի հետ կքննարկեն ու կորոշեն: «Անկախ նրանից Կարեն Կարապետյանն անդամակցելու համար կդիմի, թե չի դիմի կուսակցությանը, նա Հանրապետական թիմի առանցքային ներկայացուցիչ է: Կարեն Կարապետյանը մեր թիմի լիարժեք անդամ է, և մենք լիարժեքորեն իր հետ միասին կիսում ենք կառավարության պատասխանատվությունը»,- ասաց էդուարդ Շարմազանովը:
