Սահմանադրական բարեփոխումների մասնագիտացված հանձնաժողովը չի պատրաստվում փոփոխություն մտցնել սահմանադրության նոր նախագծում, ըստ որի, խորհրդարանական ընտրություննների արդյունքում մասնակիցներից մեկը՝ կուսակցությունը կամ դաշինքը, պետք է ստանան կայուն մեծամասնություն Ազգային ժողովում:
Եթե ընտրությունների առաջին փուլի արդյուքնում ԱԺ-ում չի ձևավորվում խորհրդարանական կայուն մեծամասնություն, ապա անցկացվում է երկրորդ փուլ, որին մասնակցում են երկու կուսակցությունները կամ կուսակցությունների դաշինքներ, որոնք առավելագույն թվով ձայներ են հավաքել: Օրերս Եվրոպական խորհրդին կից Վենետիկի հանձնաժողովը իր նախնական գնահատականում խորհուրդ էր տվել հանել այդ դրույթը:
Ինչպես այսօր հայտարարել է սահմանադրական բարեփոխումների հանձնաժողովի անդամ Վարդան Պողոսյանը, իրենք բանակցելու են Վենետիկի հանձնաժողովի հետ: Նրա խոսքով, Վենետիկի հանձնաժողովը բովանդակային առումով ոչ մի առարկություն չունի, խոսքը միայն այն մասին է, որ վիճելի դրույթը տեղ գտնի Ընտրական օրենսգրքում, այլ ոչ թե սահմանադրությունում:
Պողոսյանը ընդգծել է, որ հանձնաժողովը կարող էր այդ դրույթը ֆիքսել Ընտրական օրենսգրքում, եթե նպատակ ուներ հասարակությունից թաքցնել գործընթացը: «Բայց մենք կարծում ենք, որ դա այնքան կարևոր հարց է, որ հիմնական չափորոշիչներով պետք է տեղ գտնի սահմանադրության նախագծում», - նշել է Պողոսյանը:
Սահմանադրական բարեփոխումների հանձնաժողովը հուլիսի 15-ին հրապարակեց Հայաստանի Հիմնական օրենքի առաջին յոթ փոփոխված գլուխները: Նախագծի համաձայն, Հայաստանը գործող կիսանախագահական համակարգից անցում է կատարում կառավարման խորհրդարանական ձևի: ԱԺ ընտրվում է հինգ տարվով՝ համամասնական ընտրակարգով և կազմված է լինելու առնվազն 101 պատգամավորից: Գործող սահմանադրությամբ նրանց թիվը հասնում է 131-ի և նրանց մի մասը ընտրվում է մեծամասնական ընտրակարգով:
Այն դեպքում, երբ ընտրությունների արդյունքում ոչ մի ուժ չի կարողանում ստանալ մեծամասնություն, անցկացվում է խորհրդարանական ընտրությունների երկրորդ փուլ, որին մասնակցում են երկու կուսակցություններ կամ կուսակցությունների դաշինքներ, որոնք առավելագույն ձայներն են հավաքել: Ընտրություններին մասնակցող կուսակցությունները պարտավոր են ներկայացնել վարչապետի թեկնածություն և կառավարության ծրագրի հիմնական կետերը:
Իր հերթին նախագահը ընտրվում է յոթ տարով և ոչ ավելին, քան մեկ անգամ: Գործող սահմանադրությամբ երկրի ղեկավարն ընտրվում է հինգ տարի ժամկետով և ոչ ավել քան երկու անգամ անընդմեջ: Ի տարբերություն գործող համակարգի, Սահմանադրության նոր նախագիծը չի ենթադրում նախագահի ուղիղ ընտրություններ: Երկրի ղեկավարն ընտրվում է ընտրիչների խորհրդի կողմից, որը բաղկացած է լինելու ԱԺ պատգամավորներից և պատգամավորներին հավասար ՏԻՄ ներկայացուցիչներ:
