Եթե ՀՀ նախկին նախագահ Ռոբերտ Քոչարյանը որոշում կայացնի վերադառնալ քաղաքականություն, ապա ՀՅԴ կողջունի այդ որոշումը: Այդ մասին հայտարարել է ՀՅԴ խմբակցության ղեկավար Արմեն Ռուստամյանը: ՀՅԴ միշտ համագործակցել է Քոչարյանի հետ, նրանք ունեցել են լավ հարաբերություններ, ՀՅԴ-ը միևնույն ժամանակ ունեցել իր սեփական կարծիքն այս կամ այն հարցի շուրջ: Քոչարյանի նախագահության շրջանում ՀՅԴ իշխող կոալիցիայի մեջ էր և Ռուստամյանի խոսքով, Քոչարյանի իշխանության տարիները ՀՀ-ում տնտեսական աճի ու վերելքի տարիներ էին: Օրերս ՀԱԿ խմբակցության ղեկավար Լևոն Զուրաբյանը հայտարարել էր, որ Սերժ Սարգսյանի հետ կոալիցիոն հուշագիր ստորագրելով ՀՅԴ փորձում է չեզոքացնել Քոչարյանի գործոնը՝ զրոյացնելով նրա վերադառնալու հնարավորությունը: Ռուստամյանն այդ հայտարարությունը տարօրինակ է համարում, քանի որ տպավորություն է ստեղծվում, որ ՀԱԿ-ը, երկար ժամանակ բոլոր մեղքերի համար մեղադրելով Քոչարյանին, այժմ քարոզում է նրա վերադարձը:
