Արարատ Գրիգորյանը նշանակվեց Վայոց ձորի մարզպետ: Համապատասխան որոշումն ընդունվեց կառավարության այսօրվա նիստում: Իր խոսքում Գրիգորյանը հայտարարեց, որ ծանոթ է մարզի խնդիրներին և վստահ է, որ կիրականացնի կառավարության ծրագրերն՝ ուղղված մարզի բնակիչների կյանքի բարելավմանը: Նշենք, որ Վայոց ձորի նախկին մարզպետ Տրդատ Սարգսյանը ավելի վաղ հայտնել էր իր հրաժարականի մասին՝ աղմկահարույց միջադեպից հետո: Նա նշել էր, որ այդ որոշմանը հանգել է, քանի որ կարևորում է նոր Հայաստանում քաղաքական էթիկայի ու քաղաքական պատասխանատվության կայացումը։ Հիշեցնենք, 2019թ. սեպտեմբերի 17-ին՝ ժամը 23:40-ի սահմաններում, Եղեգնաձոր քաղաքի շենքերից մեկի բակում փոխգնդապետ Արա Մխիթարյանի և Վայոց Ձորի մարզպետի օգնական Հարություն Գրիգորյանի մասնակցությամբ ծեծկռտուք է տեղի ունեցել: Ենթադրյալ հանցագործը բռունցքով հարվածել է սպայի գլխին, որի հետեւանքով վերջինս վայր է ընկել: 28-ամյա երիտասարդին մեղադրանք է առաջադրվել, նա կալանավորվել է: Ուշագրավն այն է, որ ըստ մամուլի՝ Արարատ Գրիգորյանը հանդիսանում է փոխգնդապետին ծեծի ենթարկելու մեղադրանքով կալանավորված արդեն նախկին մարզպետի օգնական Հարություն Գրիգորյանի փաստաբանը։
