«ՖԵՐԶԻՏ» շինարարական կազմակերպության կողմից ԱՀ Մարտունի քաղաքում սկսվել են բազմաբնակարան նոր թաղամասի շինարարական աշխատանքները: Շինարարական կազմակերպության տնօրեն Արթուր Խաչատրյանն ասել է, որ գործընթացը մեկնարկել է մեկ շաբաթ առաջ, հայտնում է «Արցախպրես»-ը: Նրա խոսքով՝ Մարտունու հին հիվանդանոցի տեղում կառուցվելու է ժամանակակից չափորոշիչներին համապատասխանող 4 հինգհարկանի նոր շենք՝ 116 բնակարաններով: «Շենքերը կունենան նկուղային հարկեր: Կկառուցենք նաև խաղահրապարակներ, ավտոկայանատեղի, կբարեկարգվի մերձակա տարածքը: Շինարարությանը զուգահեռ՝ մարտունեցիների համար կվերանորոգենք նաև Մարտունու հին լողավազանը(պլյաժ): Նորակառույց շենքերի բնակարանները շահառուներին կտրամադրվեն սոցիալական տարբեր ծրագրերով»,- ավելացրել է Ա. Խաչատրյանը:
