Հակառակորդի կրակից վիրավորում ստացած զինծառայողի վիճակը շարունակում է մնալ ծայրահեղ ծանր, որևէ փոփոխություն չկա. այս մասին լրագրողներին հայտնեց առողջապահության նախարարի պաշտոնակատար Անահիտ Ավանեսյանը։ «Վիճակը մնում է ծայրահեղ ծանր», - ասաց Ավանեսյանը։ Մյուս վիրավորում ստացած զինծառայողները գտնվում են հոսպիտալում։ VERELQ-ը հիշեցնում է, որ որ հուլիսի 28-ի գիշերը Ադրբեջանը, Ռուսաստանի Դաշնության մայրաքաղաք Մոսկվայում նախատեսվող բանակցություններից առաջ, նախահարձակ մարտական գործողություններ է սկսել Հայաստանի Հանրապետության սահմանների վրա` Սոթքից մինչև Վերին Շորժա հատվածում։ Ծավալվել են մարտական գործողություններ, ընթանում է ինտենսիվ փոխհրաձգություն։ Հակառակորդը փորձել է բարելավել իր հենակետերը` ստեղծելով բարենպաստ պայմաններ առաջխաղացման համար։ Ավելի ուշ ՌԴ խաղաղապահ զորքերի հրամանատարության միջնորդությամբ ձեռք է բերվել պայմանավորվածություն հյուսիս-արևելյան ուղղությամբ հայ-ադրբեջանական զորքերի շփման գծում հրադադարի ռեժիմը վերականգնելու վերաբերյալ։ Այս պահի դրությամբ պաշտոնապես հայտարարվել է հայկական կողմից երեք զոհի ու 5 վիրավորի մասին:
