Հայաստան մատակարարվող ռուսական գազի գինը չի փոխվի ևս մեկ տարի
Թեպետ Հայաստանի կառավարությունը պաշտոնապես դիմել էր Մոսկվային առաջարկով վերանայել ՀՀ մատակարարվող գազի սակագինը նվազման միտումով, այնուամենայնիվ մինչև 2017 թ.-ի առաջին եռամսյակ կպահպանվի «կապույտ վառելիքի» ներկայիս գինը՝ 165 դոլար սահմանին: Վերջնական սպառողին, այն է՝ ՀՀ բնակչությանը գազը մատակարարվում է մոտ երկու անգամ բարձր գնով՝ 320 ԱՄՆ դոլար չափով:
Էներգետիկ հարցերի վերաբերյալ քննարկում նախատեսված է նաև Հայաստանի նախագահ Սերժ Սարգսյանի՝ այսօրվա Մոսկվա կատարելիք այցի շրջանակներում ՌԴ նախագահ Վլադիմիր Պուտինի հետ հանդիպման ժամանակ: Նախագահները կքննարկեն նաև գազի սակագնի վերաբերյալ հարցերը: Այս մասին կառավարության մարտի 10-ի նիստից հետո հայտարարեց ՀՀ արտաքին գործերի փոխնախարար Շավարշ Քոչարյանը՚ «Նախատեսվում է քննարկում գազի սակագնի հետ կապված, որպեսզի պահպանվի ներկա գինը, մինչև որ կավարտվեն գազի սակագինը նվազեցնելու վերաբերյալ բանակցությունները»:
Շավարրշ Քոչարյանն ընդգծեց, թե տեղյակ չէ գազի սակագնի նվազեցումից` հավելելով, որ դա հետագայի խնդիր է: «Գազի գինը պահպանվում է, որպեսզի բանակցությունները գնան ավելի արտոնյալ պայմանների շուրջ», - ասաց նա:
Մինչ այդ կառավարության նիստին գործադիրը հավանության արժանացրեց «Հայաստանի Հանրապետության կառավարության և Ռուսաստանի Դաշնության կառավարության միջև Հայաստանի Հանրապետություն բնական գազի առաքման ժամանակ գների ձևավորման կարգի վերաբերյալ 2013 թվականի դեկտեմբերի 2-ի համաձայնագրում փոփոխություններ կատարելու մասին» արձանագրության կնքման առաջարկությանը համաձայնություն տալու մասին նախագիծը:
Էներգետիկայի և բնական պաշարների փոխնախարար Իոսիֆ Իսայանն հիշեցրեց, որ հայկական կողմը դիմել է Ռուսաստանին առաջարկով, որ ՀՀ-ին մատակարարող գազի գինը վերանայվի: «Հաշվի առնելով, որ բանակցությունները շարունակվում են պայմանավորվածություն է ձեռք բերվել պահպանել նույն գինը 2017 թվականի առաջին եռամսյակում»,- ասաց նա: Այսպիսով՝ գազի գինը կշարունակի մնալ 165 դոլար մինչև հաջորդ տարվա առաջին եռամսյակ:
Հայաստանի կառավարության և ՌԴ կառավարության միջև Հայաստանի Հանրապետություն բնական գազի առաքման ժամանակ գների ձևավորման կարգի վերաբերյալ 2013 թվականի դեկտեմբերի 2-ի Համաձայնագրի 5-րդ հոդվածի համաձայն, կողմերի պայմանավորվածությամբ համաձայնագրում կարող են կատարվել փոփոխություններ՝ ձևակերպելով առանձին արձանագրությամբ:
Ձեռք բերված համաձայնությամբ բնական գազի գինը Հայաստանի Հանրապետության համար 2016 թվականի հունվարի 1-ից սկսած մինչև 2016 թվականի մարտի 31-ը ընկած ժամանակահատվածի համար պահպանվում է նախորդ տարվա՝ 165 ԱՄՆ դոլար չափով:
