Իրավապահները խախտել են լրագրողական աղբյուրների գաղտնիությունը. Լրագրողներ առանց սահմանների

Լրագրողներ առանց սահմանների միջազգային իրավապաշտպան կազմակերպությունը դատապարտել է Yerevan.Today կայքի խմբագրությունում ոստիկանության իրականացրած խուզարկությունը:

Ըստ կազմակերպության պաշտոնական կայքի՝  իրավապահների գործողությունները խախտում են լրագրողական աղբյուրների գաղտնիությունը:

«Yerevan.Today-ում խուզարկություն իրականացնելը և սարքավորումների առգրավումը լրագրողական աղբյուրների պաշտպանության սկզբունքի կոպիտ խախտում է, որը երաշխավորված է Հայաստանի օրենսդրությամբ և Մարդու իրավունքների եվրոպական դատարանի՝ ՄԻԵԴ-ի կողմից: Ցավում ենք, որ ոստիկանությունն առավել համաչափ եղանակ չի գտել իրենց օրինական նպատակին հասնելու համար»,- ասել է «Լրագրողներ առանց սահմանների» կազմակերպության Արևելյան Եվրոպայի և Կենտրոնական Ասիայի բաժնի ղեկավար Յոհան Բիհրը:

Հայտարարության մեջ առանձնահատուկ կերպով շեշտվել է նաև այն, որ խուզարկություն կատարվել է նաև Yerevan Today-ի սեփականատիրոջ տանը:

Հիշեցնենք, սեպտեմբերի 17-ին ՀՀ ոստիկանության 6-րդ վարչության և ՀՔԾ աշխատակիցները խուզարկություն են անցկացրել yerevan.today լրատվական կայքէջի խմբագրության գրասենյակում։