Լապշինը լուսանկարվել է Արցախի ՊԲ զինծառայողի պատկերով վերնաշապիկով

Մի քանի ամիս Բաքվի բանտերում անցկացրած հայտնի բլոգեր Ալեքսանդր Լապշինն իր սպորտային վերնաշապիկի վրա պատկերել է Արցախի ՊԲ-ի զինծառայողներից մեկի լուսանկարը։

Այս մասին Լապշինը գրել է Facebook-ի իր էջում եւ տեղադրել լուսանկարները։ Խոսքը 2016 թ.-ի ապրիլյան պատերազմի օրերին եւ դրանից հետո համացանցում լայնորեն տարածված լուսանկարներից մեկի մասին է, որում պատկերված է Արցախի պաշտպանության բանակի զինծառայողներից մեկը՝ «Կալաշնիկով» ինքնաձիգն ուսին։

Լապշինը սպորտային վերնաշապիկը ներկայացնելուց զատ, հարց է ուղղել համացանցում իր հետեւորդներին եւ ընկերներին՝ արդյո՞ք որ բանակի զինվորականն է պատկերված լուսանկարում։ «Միանգամից նշեմ, որ լուսանկարում ես չեմ։ Իսրայելի բանակում ես «Կալաշնիկով» չեմ ունեցել»,- գրել է Լապշինը։

Հիշեցնենք, որ Լապշինը 2016-ի վերջին Ադրբեջանի խնդրանքով Մինսկում ձերբակալվել էր, այնուհետեւ արտահանձնվել էր Բաքու: Ադրբեջանը նրան Արցախ այցելության համար իր սեւ ցուցակում էր ընդգրկել: Բաքվում դատարանը Լապշինին դատապարտել էր 3 տարվա ազատազրկման:

Այնուհետեւ Իլհամ Ալիեւը հրամանագիր էր ստորագրել Ալեքսանդր Լապշինին ներում շնորհելու մասին: Պարզվել էր, որ Լապշինին բանտում գրեթե ինքնասպանության էին հասցրել:

Այժմ Լապշինը դիմել է ՄԻԵԴ Ադրբեջանի դեմ, որի գանգատի հիմք են դարձել մահափորձն ու խոշտանգումները։ Դեռ հայտնի չէ, երբ տեղի կունենա դատը։