Սաուդյան Արաբիան իրավունք է վերապահում իրեն պատասխանել Իրանին

Սաուդյան Արաբիան Եմենից Էր Ռիադի ուղղությամբ բալիստիկ հրթիռի արձակումը Իրանի կողմից դրսեւորված ագրեսիայի ակտ է որակել։ Այս կապակցությամբ Սաուդյան Արաբիան հայտարարել է, որ իրավունք է վերապահում դիմել ինքնապաշտպանության եւ պատասխանել Իրանին, փոխանցում է «ՌԻԱ Նովոստի»–ն։

«Կոալիցիայի հրամանատարությունը կարծում է, որ այդ գործարկումը Իրանի ռեժիմի կողմից ագրեսիայի վրդովեցուցիչ ակտ է եւ կարող է հետագայում դիտարկվել որպես Սաուդյան Արաբիայի դեմ պատերազմի ակտ։ Դրանով հաստատվում է թագավորության օրինական իրավունքը՝ պաշտպանել իր տարածքներն ու իր ժողովրդին՝ համաձայն ՄԱԿ Կանոնադրության 51-րդ հոդվածի (ինքնապաշտպանության իրավունք)»,– ասված է զինվորականների հայտարարության մեջ։

«Հրամանատարությունը նաեւ հաստատում է, որ թագավորությունն իրեն իրավունք է վերապահում պատասխանել Իրանին պատեհ ժամանակ եւ պատշաճ ձեւով՝ ինքնապաշտպանության մասին միջազգային իրավունքին համապատասխան»,– ասված է փաստաթղթում։

Հիշեցնենք, որ նոյեմբերի 4-ին Սաուդյան Արաբիան որսացել էր Եմենի տարածքից արձակված բալիստիկ հրթիռը։