Թուրքիայի կողմից ռուսական Ս-400 համակարգերը գնելը խախտում է ԱՄՆ օրենքը․ սենատոր

Թուրքիայի կողմից ռուսական Ս-400 ՀՕՊ համակարգեր գնելը խախտում է ԱՄՆ օրենքը եւ ՆԱՏՕ-ի անդամ երկրի նկատմամբ ավտոմատ կերպով պատժամիջոցների սահմանում ենթադրում։ Այս մասին ԱՄՆ նախագահ Դոնալդ Թրամփի վարչակազմին հղված նամակում հայտարարել է դեմոկրատ սենատոր Բեն Քարդինը, փոխանցում է Politico-ն։

Սենատորը զգուշացնում է, որ Անկարայի Անկարայի կողմից Ս-400-ներ գնելը խախտում է Ռուսաստանի դեմ կոնգրեսի պատժամիջոցները։ Օրենքի համաձայն՝ պատժամիջոցները տարածվում են «բոլորի վրա, ովքեր գործարք են կնքում ՌԴ-ի պաշտպանական կամ հետախուզական բնագավառների հետ»,-գրում է Քարդինը։

«Այդ պարտադիր պատժամիջոցները ապագայում ԱՄՆ-ի եւ նրա դաշնակիցների վրա Ռուսաստանի հարձակումը զսպելու Միացյալ Նահանգների պարտավորվածությունն է»,-ասվում է Քարդինի՝ պետքարտուղար Ռեքս Թիլերսոնին եւ Ֆինանսների նախարար Սթիվ Մնուչինին ուղղված նամակում։

Նախօրեին Էրդողանը հայտնել էր, որ Անկարան արդեն Ս-400 համակարգերի ձեռքբերման համար Ռուսաստանին կանխավճար է վճարել, իսկ համաձայնագիրը ստորագրված է: ՌԴ նախագահի՝ ռազմատեխնիկական համագործակցության հարցերով օգնական Վլադիմիր Կոժինը ՏԱՍՍ-ի հետ հարցազրույցում հաստատել էր, որ Ռուսաստանը եւ Թուրքիան պայմանագիր են ստորագրել Ս-400 զենիթահրթիռային համակարգերի մատակարարման մասին, եւ այն իրականացման է պատրաստվում:

Դրանից հետո Պենտագոնի պաշտոնական ներկայացուցիչ Ջոնի Մայքլը ասել էր, որ ԱՄՆ-ն դժգոհ է ՌԴ-ից Ս-400 գնելու Անկարայի որոշումից: