Ի՞նչ տվեց Կարեն Կարապետյանը ՀՀ-ին. վարչապետը հանձնարարեց ամփոփել իր կառավարության տարին

2016 թվականի սեպտեմբերին ՀՀ վարչապետ նշանակվեց Կարեն Կարապետյանը: Մեկ ամսից, երբ կլրանա իր պաշտոնավարման մեկ տարին, վարչապետը ուզում է լսել իր կառավարության աշխատանքների ամփոփումը. նման հանձնարարական նա իջեցրեց գործադիրի այսօրվա նիստում:

Կարեն Կարապետյանի խոսքով՝ հաշվի առնելով կառավարության՝ հանրության հետ հետադարձ կապի և հաշվետվողականության քաղաքականությունը, հանրապետական գործադիր մարմինների ղեկավարները մեկ ամսյա ժամկետում պետք է ամփոփեն ըստ ոլորտների նախաձեռնած բարեփոխումների, միջոցառումների և գերակա խնդիրների լուծմանն ուղղված աշխատանքները և հանրությանը ներկայացնենհստակ հաշվետվություններ:

«Այն գերակա խնդիրները, որոնք դեռևս ընթացքի մեջ են, ևս պետք է հստակ ներկայացվեն՝ մանրամասնելով, թե կոնկրետ ի՞նչ փուլում են և ի՞նչ ժամկետներում կհասցվեն ավարտին»,- ասաց Հայաստանի վարչապետը:

Ստանձնելով պաշտոնը անցած տարի, Կարեն Կարապետյանի առաջին ելույթներից մեկը նվիրված էր Հայաստանի տնտեսության ծանր վիճակին.

«Հայաստանի տնտեսությունը գտնվում է չափազանց ծանր վիճակում: Այս պահին ես կարող եմ ասել՝ եթե մենք ուզում ենք մեր տնտեսության մեջ փոփոխություն անել, մենք պետք է համակարգային փոփոխություններ անենք: Ռեալ մեր տնտեսության վիճակը՝ բաց, ազնիվ ասում եմ, շատ ծանր է, չափազանց ծանր է», - ասել էր Կարապետյանը Ազգային Ժողովում ելույթի ժամանակ: