Հայկական գինին կհեռանա՞ ռուսական շուկայից. ՌԴ ներքին փոփոխությունների հետքերով
ՌԴ ֆինանսների նախարարության հրամանով՝ Ռուսաստան գինի ներկրողներըն այսուհետ կզրկվեն ակցիզի նվազեցված դրույքով աշխատելու հնարավորությունից, ինչը կանդրադառնա ՌԴ տարածք ներկրվող գինու գինու 25 տոկոսի վրա: Նման քայլի նպատակն է խթանել ռուս գինի արտադրողներին: Փորձագետները կանխատեսում են, որ այս որոշումը կհանգեցնի ներկրումների նվազմանը և գնաճին՝ ներկրվող մեկ գինու գինը կթանկանա շուրջ 5-10 տոկոսով: Ամենավատագույն սցենարով սա կհանգեցնի նրան, որ ռուսական շուկայից հնարավոր է հեռանա այժմ ներկայացված ընկերությունների շուրջ 80 տոկոսը:
VERELQ-ի հետ զրույցում Հայաստանի գինեգործների միության նախագահ Ավագ Հարությունյանը նշեց, որ այդ քայլը ՌԴ-ն վաղուց էր պլանավորել և ներկրող երկրների համար այն սպասելի էր: Բայց, անշուշտ, դրանից բացասական հետևանքները չեն մեղմվում.
«Նվազեցված ակցիզի վերացումը արհեստական քայլ է, որպեսզի խթանի ներքին արտադրության զարգացմանը, սակայն այն բացասաբար կազդի բոլոր ներկրող պետությունների վրա: Նախևառաջ անխուսափելի է գնաճը, քանի որ ակցիզի փոփոխությունը չի կարող չանդրադառնալ գնի վրա, իսկ դա կարող է ավելի հեռուն գնացող երևույթների առիթ հանդիսանալ»,- նշեց նա:
Թերևս այս ամենում միակ դրականը նա է, որ ներքին սպառման համար՝ Հայաստանում, գնի թանկացում չի սպասվում, դեռ հակառակը՝ հնարավոր է նկատվի որոշակի էժանացում, որովհետև, ըստ Հարությունյանի, սկզբնական շրջանում մի փոքր խառնաշփոթ ու լճացում կլինի, որը կմղվի ներքին շուկ՝ մինչ ամենն ընկնի իր տեղը:
Ավագ Հարությունյանը տեղեկացրեց, որ Հայաստանից ՌԴ տարեկան շուրջ 2 մլն շիշ է արտահանվում և գրեթե ամբողջ ծավալը հենց այն գինու տեսակների մեջ է, որի ակցիզը այսուհետ կթանկանա:
Նշենք, որ հարևան Վրաստանը, որը չի հանդիսանում ԵԱՏՄ անդամ պետություն և դիվանագիտական հարաբերություններ չունի ՌԴ հետ, տարեկան 35 մլն շիշ գինի է արտահանում Ռուսաստան: ՌԴ-ն տարեկան ներկրում է շուրջ 1,2 մլրդ դոլարի գինի, որից շուրջ 50 տոկոսը Ֆրանսիային և Իտալիային է բաժին հասնում, 14 տոկոսը՝ Վրաստանին, իսկ Հայաստանը ՝ ՌԴ դաշնակից ու ԵԱՏՄ անդամ պետություն, ընդամենը 0,4 տոկոս ունի այդ մասնաբաժնում:
Ճիշտ է, 2016 թվականին, համաձայն ՀՀ Ազգային վիճակագրական ծառայության տվյալների, Հայաստանից ռուսական շուկա արտահանվող գինու ծավալները նախորդ 2015 թվականի համեմատ ավելացել են 20,5 տոկոսով, սակայն թիվը, մասնագետների գնահատմամբ, բավարար չէ Հայաստանի և Ռուսաստանի միջև առկա քաղաքական և առևտրա-տնտեսական հարաբերությունների մակարդակին:
