Մինսկում մեկնարկել է ՀԱՊԿ ռազմական կոմիտեի նիստը

Մինսկում մեկնարկել է ՀԱՊԿ ռազմական կոմիտեի նիստը: ՌԻԱ Նովոստիի հաղորդմամբ, դրա մասնակիցները կքննարկեն ռազմական անվտանգության սպառնալիքները:   

Նիստին մասնակցում են Հայաստանի, Ռուսաստանի, Բելառուսի, Ղազախստանի, Տաջիկստանի գլխավոր շտաբերի պետերը, ինչպես նաև Ղրղզստանի գլխավոր շտաբի պետի տեղակալը: Մասնակցում է նաև ՀԱՊԿ միացյալ շտաբի պետը, իսկ նիստը տեղի է ունենում Բելառուսի պաշտպանության առաջին փոխնախարար, զինված ուժերի գլխավոր շտաբի պետ Օլեգ Բելոկոնևի նախագահությամբ։   

ՀԱՊԿ անդամ պետությունների ներկայացուցիչները կքննարկեն և մտքեր կփոխանակեն  այնպիսի առանցքային հարցերի շուրջ, ինչպիսիք են ռազմական անվտանգության սպառնալիքներն ու դրանց վերլուծությունը, ինչպես նաև հակաօդային ու հակահրթիռային պաշտպանության կազմակերպումը։

Բացի այս, ծրագրվում է քննարկել ՀԱՊԿ պաշտպանության նախարարների խորհրդին առընթեր օժանդակ մարմինների ստեղծման հարցը՝ կապված նյութատեխնիկական ապահովման, հակաօդային ու հակահրթիռային պաշտպանության, ՀԱՊԿ հավաքական ավիացիոն ուժերի նախապատրաստության ու կիրառման, ինչպես նաև ռազմական կադրեր նախապատրաստելու հարցի հետ։ Նիստի մասնակիցների ուշադրության կենտրոնում կլինի ՀԱՊԿ պետությունների զինված ուժերի միջազգային թռիչքների կազմակերպումը։  

Նշվում է, որ միջոցառման արդյունքներով նախատեսվում է ստորագրել արձանագրություն, որում, ինչպես ակնկալվում է, կամրագրվեն ընդունված որոշումները և կտրվեն համապատասխան հանձնարարականներ դրանց հետագա իրականացման ուղղությամբ: