Հայաստանի անդամակցությունը ՀԱՊԿ-ին սառեցված է. Անդրանիկ Քոչարյան

Հայաստանի Ազգային ժողովի իշխող «Քաղաքացիական պայմանագիր» խմբակցության պատգամավոր Անդրանիկ Քոչարյանը փետրվարի 26-ին լրագրողների հետ զրույցում ասաց, որ երկրի անդամակցությունը Հավաքական անվտանգության պայմանագրի կազմակերպությանը (ՀԱՊԿ) սառեցված է։

««Սառեցված» բառը նշանակում է, որ այն սառեցված է»,- ընդգծեց Քոչարյանը՝ չմանրամասնելով, թե ինչ է դա նշանակում։

Հայաստանի վարչապետ Նիկոլ Փաշինյանը փետրվարի 23-ին France24 հեռուստաալիքին տված հարցազրույցում ավելի վաղ հայտարարել էր, որ երկրի անդամակցությունը ՀԱՊԿ-ին սառեցվել է՝ Հայաստանի նկատմամբ ստանձնված պարտավորությունները չկատարելու պատճառով։ Միաժամանակ, պատգամավոր Քոչարյանը հրաժարվել է մեկնաբանել Ուկրաինայի նախագահ Վլադիմիր Զելենսկու՝ Հայաստան կատարելիք այցի հարցը։

Ավելի վաղ ՌԴ ԱԳՆ-ն արձագանքել էր Հայաստանի վարչապետ Նիկոլ Փաշինյանի հայտարարությանը Հավաքական անվտանգության պայմանագրի կազմակերպությանը (ՀԱՊԿ) երկրի մասնակցության «սառեցման» վերաբերյալ՝ նշելով, որ Մոսկվան այս հարցում ակնկալում է Երևանից համապարփակ պարզաբանում երկկողմանի խողովակներով: