Տղե՛րք, պայքարը շարունակվում է. երկրով մեկ ընդդիմադիրների տներում խուզարկություններ են

Ամբողջ հանրապետությունում ընդդիմադիրների տներում խուզարկություններ են: Այս մասին գրում է փաստաբան Անահիտ Սարգսյանը:

Վաղ առավոտից խուզարկությունների մասին ահազանգել են ՀՅԴ-ի, «Հայրենիք» կուսակցության ներկայացուցիչները։

Facebook-ի իր էջում «Հայրենիք» կուսակցության նախագահ, ԱԺ «Պատիվ ունեմ» խմբակցության ղեկավար Արթուր Վանեցյանը գրել է.

"Հիմա էլ խուզարկում են մեր կուսակցական ընկեր Արսեն Նիկողոսյանի բնակարանը. Այս ամենը կարող էր շատ ծիծաղելի լիներ, եթե այսքան զավեշտալի չլիներ: 

Արսենը պայքարող տեսակ է, Արսենը հայրենասեր է, Արսենը սիրում է իր հայրենիքը և հային: Արսենին պայքարից չեք կարողանալու հետ պահեք, նրա պայքարը հանուն Հայաստանի է, հանուն Արցախի է և հանուն հայի է:

Արսեն ջան պինդ մնա, մեր պայքարը արդար է և անկասելի:

հ.գ. նաև տեղեկացա, որ նույն ժամին խուզարկություններ են սկսել ընդդիմադիր մի շարք այլ գործիչների բնակարաններում:

Տղե՛րք, պայքարը շարունակվում է, ամեն ինչ լավ է լինելու",- գրել է Վանեցյանը:

«Հայրենիք» կուսակցության անդամ Արսեն Բաբայանն էլ ավելացնում է.

"Քննչական կոմիտեի քննիչները «Հայրենիք» կուսակցության անդամ Արսեն Նիկողոսյանի բնակարանում այս պահին կատարում են խուզարկություն, փնտրում են թմրանյութ: Զարմանալու ոչինչ չկա, նրանք հանգիստ կարող էին նաև Իսկանդեր փնտրել Արսենի գրպանում:

Թուրքական իշխանության հայաստանյան ներկայացուցչության հրահանգով իրականացվող այս քաղաքական հետապնդումն ունի մեկ նպատակ, վախեցնելով կանխել սպասվող իշխանափոխությունը:

Արսենին վախեցնել չեք կարող և դա դուք հրաշալի գիտեք:

Արսեն ջան, սրանք քեզ ուժ են տալիս, ընդունիր դա»,- գրել է նա:

ԱԺ "Պատիվ ունեմ" խմբակցության պատգամավոր Հայկ Մամիջանյանը հայտնում է, որ վաղ առավոտվանից խուզարկություն է իրականացվում ՀՀԿ Նոյեմբերյանի շրջանային խորհրդի կազմակերպչի տանը: 

«Նաև Գյումրիում»,- հավելել է նա։

Նշենք, որ այսօր առավոտվանից մեկնարկել է "Դիմադրության" շարժման երթը Ֆրանսիայի հրապարակից: Այս պահին Նիկոլ Փաշինյանի հրաժարականը պահանջող ակցիայի մասնակիցները շրջափակել են ԱԳՆ շենքը: