Թուրքիայի եւ ԱՄՆ նախագահներ Ռեջեփ Թայիփ Էրդողանն ու Բարաք Օբաման հեռախոսազրույց են ունեցել Սիրիայում եւ Իրաքում տիրող իրավիճակի հարցով՝ մասնավորապես քննարկելով «Իսլամական պետություն» ահաբեկչական խմբավորման դեմ պայքարը, ասված է Թուրքիայի նախագահի աշխատակազմի տարածած հայտարարության մեջ, փոխանցում է «ՌԻԱ Նովոստի»–ն։ «Կողմերը կարծիքներ են փոխանակել ահաբեկչական խմբավորումներին հակազդելու հարցով։ ԱՄՆ նախագահը բարձր է գնահատել ԻՊ գրոհայինների դեմ Անկարայի քայլերը, այդ թվում՝ Սիրիայի ազատ բանակի աջակցությունը։ Կողմերն ընդգծել են նաեւ Իրաքի հյուսիսում Քրդական բանվորական կուսակցության գործունեության անթույլատրելիությունը»,– ասված է հաղորդագրության մեջ։ ԱՄՆ նախագահը գոհունակություն է հայտնել Անկարայի եւ Բաղդադի միջեւ Իրաքում ԻՊ–ի դեմ պայքարին Թուրքիայի ներգրավվածության կապակցությամբ։ Երկու նախագահները հայտարարել են, որ պաշտպանում են Իրաքի ինքնիշխանությունն ու տարածքային ամբողջականությունը՝ ընդգծելով տարածաշրջանը ԻՊ–ի եւ Քրդական բանվորական կուսակցության զինյալներից ազատագրելու անհրաժեշտությունը։
