Վրաստանի մայրաքաղաք Թբիլիսիում բողոքի ակցիա է տեղի ունեցել երկրի արտգործնախարարության շենքի դիմաց, հավաքվածները դեմ են արտահայտվել միգրացիայի մասին ՄԱԿ-ի ընդունած գլոբալ պակտին, որին կողմ է քվեարկել նաև Վրաստանը, գրում է newsgeorgia.ge-ն: Ըստ ցույցի մասնակիցների՝ Վրաստանի նման քայլը կարող է հանգեցնել Ասիայից ու Աֆրիկայից ներգաղթյալների լուրջ հոսքի, որին երկիրն ունակ չէ դիմակայել ներկա պայմաններում: «Ներգաղթյալների մասին պակտի ստորագրումը երաշխավորում է Վրաստանի տարածքում հայտնվելու անսահմանափակ ու անխոչընդոտ հնարավորություն ներգաղթյալների համար, պակտի 4-րդ հոդվածում ասվում է, որ ներգաղթյալները սահմանի վրա անվերապահորեն պետք է ապահովվեն ինքնության վկայականով ու անհրաժեշտ փաստաթղթերով: Սոցիալական ու ժողովրդագրական տեսանկյունից Վրաստանն ունակ չէ ընդունել հարյուրավոր, հազարավոր ու միլիոնավոր ներգաղթյալներ»,- ասել է ակցիայի մասնակիցներից մեկը:Վրաստանի ԱԳՆ-ից այս առիթով նշել են, որ վերոնշյալ պակտի ստորագրումը որևէ հավելյալ պարտավորվածություններ չի դնում Վրաստանի վրա ու ներգաղթալների ինտենսիվ հոսքը դեպի Վրաստան այժմ ակտուալ խնդիր չի հանդիսանում:
