Փոխվարչապետ Տգրան Ավինյանը հայտնել է, որ այսօր ՌԴ խաղաղապահների միջնորդությամբ տեղի է ունեցել գերիների փոխանակման գործընթաց: «Ադրբեջանից Հայաստան են տեղափոխվել պաշտոնապես հաստատված 44 մեր հայրենակիցներ։ Այս փուլում վերադարձվում են այն հայ գերիները, որոնց գերեվարված լինելու փաստը հաստատված է Ադրբեջանի եւ Կարմիր Խաչի կողմից: Անհետ կորած եւ հնարավոր գերեվարված մեր մյուս հայրենակիցների հայտնաբերման ու նրանց վերադարձի կազմակերպման գործընթացն ինտենսիվ կերպով շարունակվում է: Վերադարձած գերիների մասին ավելի ուշ կտրամադրվի լրացուցիչ տեղեկատվություն»,- տեղեկացրել է Տիգրան Ավինյան։ Ավելի վաղ Արցախի նախագահ Արայիկ Հարությունյանը հայտնել էր, որ Երևանում վայրէջք կկատարի հայրենիք վերադարձող մեր չորս տասնյակից ավելի գերիներին տեղափոխող օդանավը: Այս մասին Ֆեյսբուք իր էջում տեղեկացնում ԱՀ նախագահ Արայիկ Հարությունյանը: «Սիրելի ՛ հայրենակիցներ Այս ծանր օրերին, երբ ահեղ պատերազմի հետևանքով ունեցած կորստի ցավից ու դառնությունից մեր ժողովուրդը փորձում է կրկին ուղղել իր մեջքը, երբեմն նաև լուսավոր կետեր են նշմարվում, որոնք մեզ ապրելու, նորից ամեն ինչ կառուցելու հույս ու հավատ են ներշնչում: Րոպեներ հետո Երևանում վայրէջք կկատարի հայրենիք վերադարձող մեր չորս տասնյակից ավելի գերիներին տեղափոխող օդանավը: Նրանց կդիմավորեմ անձամբ՝ հարազատների հետ միասին: Անհայտ կորած մեր բոլոր հայրենակիցների ճակատագրերի պարզումը, ողջ մնացած բոլոր զինծառայողներին ու քաղաքացիներին վերադարձնելը, զոհվածների մարմինները գտնելն ու հարազատներին փոխանցելը շարունակում են մնալ մեր օրակարգի ամենահրատապ հումանիտար հարցերը»,-ասված է գրառման մեջ: Նշենք՝ ՀՀ վարչապետի մամուլի խոսնակ Մանե Գևորգյանը տեղեկացրել էր, որ սպասվում է մեր գերիների առաջին խմբի վերադարձը: Ավելի վաղ, ադրբեջանի ռազմագերիների, պատանդների եւ անհայտ կորած քաղաքացիների հարցերով պետական հանձնաժողովը տարածել է հաղորդագրություն, ըստ որի՝ այսօր՝ դեկտեմբերի 14-ին, մեկնարկել է գերիների եւ ազատազրկված անձաց փոխանակումը հայկական կողմի հետ։ Ադրբեջան վերադարձված ադրբեջանցի գերիների եւ ազատազրկված անձանց թվում են նաեւ ադրբեջանցի դիվերսանտներ Դիլհամ Ասկերովը եւ Շահբազ Գուլիեւը:
