Իշխանությունը փորձում է ռազմագերիների, գերիների հարցը քաղաքական օրակարգից հանել.պատգամավոր

44-օրյա պատերազմի, նոյեմբերի 16-ի ադրբեջանական ագրեսիայի հետևանքով գերեվարված անձանց նկատմամբ իշխանության մեղադրանք/քննադատությունները ունեն ընդամենը մեկ պատճառ։ Այս մասին Facebook-ի իր էջում գրել է ԱԺ "Պատիվ ունեմ" խմբակցության պատգամավոր Տիգրան Աբրահամյանը:

«Դեռ չեմ էլ անդրադառնում, թե ինչպիսի փոփոխություններ է տեղի ունեցել իշխանության վարքագծում, գերիների նկատմամբ արտահայտած ձևակերպումներում և թե ինչպես «հերոս տղաները» փոխակերպվեցին «դասալիքների»։

Գերիների, ռազմագերիների խնդիրը վերջին մեկ տարվա ընթացքում քննարկվող և ամենատարբեր համատեքստում բարձրաձայնվող հարցերից է։

Այս իշխանությունը գիտակցելով իր անճարությունը, անզորությունը փորձում է ռազմագերիների, գերիների հարցը հասարակական ու քաղաքական օրակարգից հանել՝ նրանց վարկաբեկելու, առանց տարբերակում մտցնելու «դասալիք», հանցագործ անվանելու միջոցով։

Միանգամից ասեմ, որ անկախ գերեվարման հանգամանքներից, պատճառներից, բոլոր ժամանակներում էլ գերությունից վերադարձող անձինք համապատասխան ընթացակարգերով անցնում են։

Ովքեր հանցանք են գործել պետք է իրավական պատասխանատվություն կրեն, սակայն մինչև օրինական ուժի մեջ մտած դատավճիռները մարդկանց թիրախավորելը, հանցագործ նշանակելն անթույլատրելի է»։

Ավելի վաղ հայտնի դարձավ, որ դեկտեմբերի 4-ին Ադրբեջանի գերություներից Հայաստան վերադարձված մի քանի զինծառայողների մեղադրանք է առաջադրվել: Դատարանը մեղադրյալի կարգավիճակ ունեցող մեկ զինծառայողի՝ Ս.Ա.-ին կալանավորելու միջնորդությունը բավարարել է, իսկ մյուս 4 զինծառայողներին կալանավորելու միջնորդությունների առնչությամբ տեղեկատվություն դեռ չկա: