Մենք խոսում ենք երկիրը կորցնելու մասին, իշխանությունները՝ շրջանցող ճանապարհների

Պատերազմից հետո, այս մեկ տարվա ընթացքում, Հայաստանը չորս պաշտպանության նախարար է փոխել: Չթվարկելով մնացած բոլոր փոփոխությունները ԶՈՒ ղեկավարության շարքերում՝ մենք մտել ենք կադրային մի շրջապտույտի մեջ, որից դուրս գալու հեռանկարները այս պահին տեսանելի չեն: Այս մասին «Պատերազմ և կապիտուլյացիա. մեկ տարի անց» թեմայով քննարկմանը հայտարարեց ԱԺ "Պատիվ ունեմ" խմբակցության պատգամավոր Տիգրան Աբրահամյանը:

"Այս պայմաններում խոսել երկրում պաշտպանական համակարգից դուրս գործընթացների մասին որևէ իմաստ չունի: Թեև Հայաստանը 8 ամիս է խոսում է ԶՈՒ արդիականացման մասին, նոր կոնցեպտի մասին, բայց իրականում դա գոյություն չունի: Մինչդեռ հետպատերազմյան իրավիճակի առաջին քայլերից մեկը պետք է լիներ անվտանգության համակարգի վերականգնումը, վերաձևավորումը, մոդեռնիզացիան, ինչը տեղի չի ունեցել",- ընդգծեց նա:

Ու մինչ, Տիգրան Աբրահամյանի խոսքով, Ադրբեջանը շարունակում է դիրքավորվել Հայաստանում՝ Սյունիքում, Վայոց ձորում, Գեղարքունիքում, ունենք ՀՀ ԶՈՒ-ին հասցված հեղինակազրկում և այլ նեգատիվ երևույթներ:

«Այս ամենը ունի մեկ պատճառ՝ Նիկոլ Փաշինյան: Ցանկացած ոլորտում խնդիրների ու մարտահրավերների հիմքում Փաշինյանն է և  Հայաստանում գործող ցանկացած ուժի համար՝ խորհրդարանական, թե արտախորհրդարանական, գիտակից մարդու համար այս խնդիրների լուծումը պետք է սկսել Փաշինյանի փոփոխությունից»,- ասաց նա:

Պատգամավորը հավելեց, որ մինչև իրենք բարձրաձայնում են երկիրը կորցնելու մասին, իշխանությունները խոսում են շրջանցող ճանապարհների մասին:

"Սյունիքի անվտանգության մասով գոյություն ունեցող բոլոր մտաահոգությունները օբյեկտիվ են, միաժամանակ այսօր խնդիր է նաև սահմանին կանգնած յուրաքանչյուր զինծառայողի անվտանգության հարցը՝ նրանք ևս պետք է լինեն պաշտպանված: Դա ենթադրում է համապատասխան տեխնիկական, ամրաշինարարական միջոցներով համալրված սահման, դա նշանակում է թիկունքային համապատասխան ապահովում և այլն: Նրանք իրենց թիկունքում այսօր պետություն չունեն, պետությունը բարձիթողի վիճակում է և այս հանցավորության պատճառով մեր զինվորները հայտնվում են մի վիճակում, որը մենք ամենավատ երազներում անգամ պատկերացնել չէինք կարող",- շեշտեց Տիգրան Աբրահամյանը: