ՀԱՊԿ ներկայացուցիչները մտահոգված են Հայաստանի եւ Ադրբեջանի սահմանին զինված միջադեպերի աշխարհագրության ընդլայնմամբ եւ հաճախականությամբ: Այս մասին հայտնել Է կազմակերպության մամուլի քարտուղար Վլադիմիր Զայնետդինովը՝ ամփոփելով ՀԱՊԿ գլխավոր քարտուղար Ստանիսլավ Զասի եւ ՀՀ վարչապետ Նիկոլ Փաշինյանի հանդիպման արդյունքները, փոխանցում է ՏԱՍՍ-ը։
«Իհարկե, մենք կարծում ենք, որ հայ-ադրբեջանական սահմանին տեղի ունեցած միջադեպերը, որոնց մասին դուք խոսում եք, վտանգ են ներկայացնում Հայաստանի անվտանգության համար։ Եթե խոսենք խնդրի լուծման ուղիների մասին, մենք կարծում ենք, որ այդ իրավիճակի քաղաքական լուծման հնարավորությունները սպառված չեն։ Ըստ էության, դա լավագույն տարբերակն էր բոլորի համար», - Զասի խոսքը մեջբերում է Զայնետդինովը։
Զասն ընդգծել է, որ ստեղծված լարվածությունը բացասաբար է ազդում Հայաստանի և ընդհանրապես ՀԱՊԿ պատասխանատվության գոտում անվտանգության վրա։ Այն բարդացնում է Ռուսաստանի, Հայաստանի եւ Ադրբեջանի ղեկավարների՝ 2020 թվականի նոյեմբերի 9-ի եւ 2021 թվականի հունվարի 11-ի խաղաղ պայմանավորվածությունների կատարումը ։
«Ստանիսլավ Զասը նաեւ ընդգծել է, որ անդամ պետությունների ինքնիշխանության եւ տարածքային ամբողջականության ապահովումը ՀԱՊԿ-ի առանցքային առաջնահերթություններից մեկն է», - նշել է Զայնետդինովը:
«Ընդգծվել է, որ առաջացած լարվածությունը բացասաբար է ազդում Հայաստանի անվտանգության և կազմակերպության պատասխանատվության գոտում ընդհանուր առմամբ և բարդացնում է Հայաստանի, Ռուսաստանի և Ադրբեջանի ղեկավարների՝ 2020 թվականի նոյեմբերի 9 - ի և 2021 թվականի հունվարի 11-ի խաղաղ պայմանավորվածությունների կատարումը», - ասել է նա:
Հանդիպմանը քննարկվել են նաեւ սեպտեմբերին նախատեսված Հավաքական անվտանգության խորհրդի նստաշրջանի եւ Դուշանբեում ՀԱՊԿ արտգործնախարարների խորհրդի, պաշտպանության նախարարների խորհրդի եւ անվտանգության խորհուրդների քարտուղարների կոմիտեի համատեղ նիստի նախապատրաստման ընթացքը եւ Կազմակերպությունում նախագահության առաջիկա անցումը Հայաստանին: Գլխավոր քարտուղարը տեղեկացրել է նիստերի նախապատրաստման ընթացքի մասին և ընդգծել ՀԱՊԿ-ում Հայաստանի ակտիվ և շահագրգիռ դիրքորոշումը:
Մասնավորապես նշվել է, որ 2022 թվականը հոբելյանական է կազմակերպության համար։ «Այդ կապակցությամբ Հավաքական անվտանգության խորհրդի նստաշրջանում նախատեսում ենք ստորագրել «Հավաքական անվտանգության պայմանագրի ստորագրման 30-ամյակին եւ Հավաքական անվտանգության պայմանագրի կազմակերպության 20-ամյակին նվիրված միջոցառումների ծրագրի մասին» որոշումը»,-ասել է մամուլի քարտուղարը:
Նախատեսվում է նաեւ մի շարք այլ փաստաթղթերի ստորագրում, որոնց թվում է ՀԱՊԿ Հավաքական անվտանգության խորհրդի հռչակագիրը:
