ԼՂ-ի շուրջ եռակողմ պայմանավորվածությունների իրագործումն այլընտրանք չունի. Պեսկով

Մոսկվայի և Բաքվի շփումները գնում են մշտական հիմքի վրա, բոլորը համաձայն են, որ Ղարաբաղի շուրջ եռակողմ համաձայնագրերի իրագործումը կարևոր է և այլընտրանք չունի։ Այս մասին լրագրողներին հայտնել է Ռուսաստանի նախագահի մամուլի քարտուղար Դմիտրի Պեսկովը, փոխանցում է «ՌԻԱ Նովոստի»-ն։

«Ադրբեջանական կողմի հետ շփումները շարունակվում են մշտական հիմունքներով։ Բոլորը համաձայն են, որ եռակողմ պայմանավորվածությունների դրույթների իրականացումը շատ կարևոր է և անայլընտրանք։ Եվ այդ իրագործման շրջանակներում հենց շփումներ են իրականացվում հայկական կողմի և ադրբեջանական կողմի հետ։ Երեկ մանրամասն խոսել ենք երկկողմ հարաբերությունների մասին, քննարկվել են եռակողմ պայմանավորվածությունների իրականացման տարբեր նրբություններ և առևտրատնտեսական համագործակցությունը, բնականաբար»,- ասել է Պեսկովը՝ պատասխանելով այն հարցին, թե կան արդյոք ինչ-որ պայմանավորվածություններ Պուտինի և Փաշինյանի բանակցությունների արդյունքում, և արդյոք նախատեսվում են շփումներ ադրբեջանական կողմի հետ:

Չորեքշաբթի Մոսկվայում կայացել են ՌԴ նախագահ Վլադիմիր Պուտինի և ՀՀ վարչապետի պաշտոնակատար Նիկոլ Փաշինյանի բանակցությունները։