Խորհրդարանը պետք է պնդի ԵԽ-ում Բաքվի լիազորությունների դադարեցումը. Զոհրաբյան

ԱԺ «Բարգավաճ Հայաստան» խմբակցության անդամ Նաիրա Զոհրաբյանն այսօր՝ հունիսի 30-ին, ԱԺ արտահերթ նիստում իր ելույթում առաջարկեց ընդունել խորհրդարանի հայտարարություն, որով կոչ կարվի միջազգային հանրությանը պատժամիջոցներ կիրառել Ադրբեջանի նկատմամբ:

Նա նշել է, որ ռազմագերիների վերադարձի հարցի շուրջ ստեղծված իրավիճակի պատճառով ինքն է նման կոչով դիմել միջազգային հանրությանը։ Սակայն խորհրդարանի կողմից նման կոչն ավելի ծանրակշիռ կլինի։

Զոհրաբյանն ընդգծել է, որ Ազգային ժողովը պարտավոր է նման կոչով հանդես գալ միջազգային հանրությանը եւ հստակ պատժամիջոցներ սահմանել, որոնք պետք է կիրառվեն: Օրինակ՝ ԵԽ-ում ադրբեջանական պատվիրակության լիազորությունները պետք է դադարեցվեն, պատժամիջոցներ պետք է կիրառվեն Ադրբեջանի նախագահ Իլհամ Ալիեւի եւ նրա ընտանիքի անդամների դեմ, կարծում է Զոհրաբյանը:

Զոհրաբյանն ընդգծել է, որ Բաքվի դիրքորոշումը հայ ռազմագերիների հարցում մնում է անփոփոխ, ադրբեջանական կողմը շարունակում է նրանց մեղադրանքներ առաջադրել ծանր հանցագործությունների համար, որոնք պատժվում են 14-20 տարվա ազատազրկմամբ, իսկ որոշ դեպքերում՝ ցմահ ազատազրկմամբ:

Նա տեղեկացրել է, որ ԵԽԽՎ վերջին նստաշրջանի ընթացքում ինքը փորձել է հայ ռազմագերիների հարցը քննարկել ադրբեջանական պատվիրակության ղեկավարի հետ: Զրույցի արդյունքում Զոհրաբյանը եկել է այն եզրակացության, որ Բաքուն մտադիր չէ փոխել իր դիրքորոշումն այս հարցում։

«Պատվիրակության ղեկավարը հստակ հայտարարել է, որ հայ ռազմագերիների վերադարձի հարցի քննարկումը հնարավոր է միայն այն դեպքում, եթե Հայաստանը ճանաչի Ադրբեջանի տարածքային ամբողջականությունը, ներառյալ Արցախի տարածքների 75 տոկոսը», - հայտարարել է պատգամավորը: