ԿԸՀ-ն ամփոփել է նախնական արդյունքները. Փաշինյանի կուսակցությունը հավաքել է 53,92% ձայն

Հայաստանի կենտրոնական ընտրական հանձնաժողովը (ԿԸՀ) կազմել է խորհրդարանական ընտրությունների նախնական արդյունքների արձանագրություն, որի համաձայն վարչապետի պաշտոնակատար Նիկոլ Փաշինյանի կուսակցությունը հավաքել է 53,92 տոկոս:

«Ընտրացուցակներում ընդգրկված է եղել 2 595 334 ընտրող, քվեարկությանը մասնակցել է 1 282 411, կամ ընտրողների 49,4 տոկոսը։ «Քաղաքացիական պայմանագիր» կուսակցության օգտին քվեարկել է 687 414 մարդ կամ 53,92 տոկոս, «Հայաստան» դաշինքի օգտին՝ 268 300, կամ 21,4 տոկոս, «Պատիվ ունեմ» դաշինքի օգտին՝ 66 647, կամ 5,23 տոկոս», - արձանագրությունն ստորագրելուց առաջ նիստի ժամանակ հայտնել է ԿԸՀ նախագահ Տիգրան Մուկուչյանը:

Գագիկ Ծառուկյանի «Բարգավաճ Հայաստան» կուսակցությունը հավաքել է 50 419 ձայն կամ 3.95%:

ԿԸՀ ղեկավարը նաև հայտնել է, որ վերջնական արդյունքները կամփոփվեն քվեարկությունից հետո յոթերորդ օրը:

Թեեւ «Պատիվ ունեմ» դաշինքը չի հավաքել անհրաժեշտ 7 տոկոս ձայներ, սակայն կանցնի խորհրդարան, քանի որ օրենսդրության համաձայն՝ խորհրդարանում պարտադիր է առնվազն երեք քաղաքական ուժերի ներկայությունը։

VERELQ-ը հիշեցնում է, որ հունիսի 20-ին Հայաստանում տեղի ունեցան արտահերթ խորհրդարանական ընտրություններ։ Ընտրողների ցուցակներում ընդգրկված է եղել 2 մլն 593 հազար 572 մարդ։ Ընտրություններին մասնակցել է 21 կուսակցություն եւ 4 դաշինք, ընդամենը 2510 թեկնածու: