Փաշինյանը մտադիր Է Պուտինի հետ քննարկել ռազմատեխնիկական համագործակցությունը

ՀՀ վարչապետ Նիկոլ Փաշինյանը «ՌԻԱ Նովոստի»-ին տված հարցազրույցում պատմել է, որ մտադիր է Ռուսաստանի նախագահ Վլադիմիր Պուտինի հետ քննարկել ռազմատեխնիկական համագործակցության հարցերը:

Նրա խոսքով՝ օրակարգում են հայ-ռուսական դաշնակցային հարաբերությունների բոլոր ոլորտներին վերաբերող թեմաները։ Փաշինյանը նշել է, որ այժմ հայկական զինված ուժերում արդեն մեկնարկել է լայնածավալ բարեփոխում, որը նույնպես իրականացվում է ռուս գործընկերների հետ սերտ համագործակցությամբ:

«Համոզված ենք, որ այդ համագործակցությունը հաջողությամբ շարունակվելու է, ինչում շահագրգռված է Հայաստանի կառավարությունը», - ասել է վարչապետը:

Փաշինյանը Մոսկվա կայցելի ապրիլի 7-ին։ Հաղորդվում էր, որ երկու երկրների առաջնորդները կքննարկեն Ղարաբաղի վերաբերյալ պայմանավորվածությունների իրագործումը եւ Հայաստանում կայանալիք արտահերթ ընտրությունները:

Մինչև 2018-ին իշխանության գալը Փաշինյանը քննադատաբար է արտահայտվել այն միավորումների մասին, որոնց մասնակցում է Ռուսաստանը՝ ԵԱՏՄ-ն և ՀԱՊԿ-ը։ Սակայն վարչապետ դառնալուց հետո հրաժարվեց արտաքին քաղաքականության կտրուկ փոփոխություններից։

Մինչդեռ փորձագետները կարծում են, որ նրա շրջապատն ավելի շատ տրամադրված է Արևմուտքի հետ համագործակցության։

Վերջին շրջանում Փաշինյանը հայտարարել է, որ մտադիր է ամրապնդել համագործակցությունը Ռուսաստանի հետ՝ որպես անվտանգության ոլորտում թիվ մեկ գործընկեր։ Մասնավորապես, նա առաջարկել է մտածել Ռուսաստանի և Հայաստանի զորքերի միացյալ խմբավորման ուժեղացման մասին, ինչպես նաեւ հայտարարել բանակի բարեփոխման մասին: