Շարմազանով. Ադրբեջանը ձախողվեց թե ռազմի դաշտում, թե երեկ Վիեննայում
ԵԱՀԿ Մինսկի խմբի համանախագահ երկրների արտգործնախարարների հայտարարության մեջ ներառված են այն թեզիսները, որի մասին ապրիլին խոսել է հանրապետության նախագահը: Այս մասին լրագրողների ետ ճեպազրույցում հայտարարեց Ազգային Ժողովի փոխնախագահ Էդուարդ Շարմազանովը՝ անդրադառնալով նախօրեին Վիեննայում կայացած Սարգսյան-Ալիև հանդիպմանն ու դրա արդյունքներով ընդունված հայտարարությանը:
Շարմազանովը հիշեցրեց, որ Սերժ Սարգսյանն ապրիլին հայտարարեց, որ 1994-95 թթ. զինադադարը պետք է լինի միակ փաստաթուղթը, որի հիման վրա պետք է շարունակվեն բանակցությունները՝ նոր զինադադարի պայմանագրի կնքումն անթույլատրելի է: Բացի այս, մատնանշեց նա, Մինսկի խմբի համանախագահ երկրների արտգործնախարարները միասնական հայտարարության մեջ հստակ արձանագրեցին, որ 1994 թվականի զինադադարը գործում է և միակ փաստաթուղթն է.
«Իսկ այդ փաստաթղթում հստակ ամրագրված է Լեռնային Ղարաբաղի ստորագրությունը և երբ Լավրովը, Քերին և Ֆրանսիայի արտգործնախարարը հայտարարություն են տարածում, որ 1994 թվականի փաստաթուղթը գործում է, սա գործում է իր ողջ հետևանքով: Լեռնային Ղարաբաղը կողմ է, անուղղակիորեն այդ հայտարարության մեջ նշվում է, որ Ղարաբաղը կողմ է և առանց Ղարաբաղի որևէ մեկը չի կարող լուծել այդ խնդիրը: Եվ զինադադարի համաձայնագրի ստորագրման տրամաբանությունը պետք է շարունակվի, այլ նոր տրամաբանություն կամ սկզբունք չի կարող գործել, իսկ սա նշանակում է, որ Ադրբեջանն այդտեղ չհաջողեց, որովհետև հայտնի է, որ Ադրբեջանի նպատակն էր նախևառաջ չեղյալ հայտարարել 1994-ի զինադադարը»,- ասաց ԱԺ փոխնախագահը:
Երկրորդ կարևոր արդյունքը, որ առկա է Վիեննայի հանդիպումից հետո այն է, որ տարիներ շարունակ ՀՀ-ն ու ԼՂՀ-ն նշել են, որ կողմ են շփման գծում հետաքննության մեխանիզմների իրականացմանը՝ վստահությունն ամրապնդելու ուղղությամբ և միակ կողմը, որը դեմ է եղել դրան Ադրբեջանն է իր նախագահող հանդերձ.
«Ադրբեջանն ասում էր՝ տարածքներից դուրս եկեք, նոր ներդնենք մեխանիզմներ, բայց տեսանք, որ այստեղ ևս Ադրբեջանն իր նպատակին չհասավ: Իսկ Սերժ Սարգսյանի առաջարկը, որ այդ մեխանիզմների իրականացումը պարտադիր է ընդունվեց»:
Հաջորդը՝ ամրագրվեց, որ բացառապես խաղաղ կարգավորում պետք է լինի: Էդուարդ Շարմազանովի խոսքով՝ այս հայտարարությունը ցույց տվեց, որ պաշտոնական Վաշինգտոնը, Փարիզն ու Մոսկվան ընդունել են պաշտոնական Երևանի առաջարկները և ունեն նույն տեսլականը, ինչ Երևանը: Այսինքն՝ նախագահ Սարգսյանի առաջարկներն ընդունվել են ոչ թե բանավոր, այլ իրենց արտացոլումն են գտել երեկվա հայտարարության մեջ.
«Բանակցությունների վերսկսման համար հանրապետության նախագահը հնչեցրել է մի շարք առաջարկներ և երեկ Վաշինգտոնը, Փարիզն ու Մոսկվան հստակ նշեցին, որ համակարծիք են Երևանի հետ: Բնականաբար պաշտոնական Բաքվի բոլոր պահանջները չիրականացան»,- ընդգծեց պաշտոնյան:
Հարցին՝ նշանակում է, արդյոք, որ հաջորդ հանդիպումների Լեռնային Ղարաբաղը որպես կողմ մասնակցելու է, Էդուարդ Շարմազանովը նշեց, որ երեկ տեղի ունեցավ ընդամենը զինադադարի ու խաղի կանոնների վերահաստատում, բայց նախ պետք է տեսնենք՝ Ադրբեջանը կհետևի՞ այս հորդորներին, կհետևի՞ իր ստանձնած պարտավորությանը, թե ոչ: Իսկ հետագան արդեն կերևա.
«Բայց այն, որ Լեռնային Ղարաբաղը պետք է լինի բանակցային կողմ, այդ պահանջը նոր չէ: Ապրիլյան պատերազմից հետո ՄԽ համանախագահներն ու ռուսաստանցի համանախագահ Պոպովը Երևանում դա հայտարարեց և երեկ ամրագրվեց հայտարարությունում: Եվ դա գլխավոր սկզբունքներից մեկն է»:
Վերջում ՀՀԿ-ական փոխնախագահը հայտարարեց, որ Ադրբեջանը ձախողվեց թե ռազմի դաշտում, թե երեկ Վիեննայում, քանի որ իր առջև դրված խնդիրները նա չլուծեց:
