Տարակուսանքով և զարմանքով ծանոթացանք «Իսկանդերների» մասին Փաշինյանի հայտարարությանը. ՌԴ ՊՆ
Հայաստանը Լեռնային Ղարաբաղի հակամարտության ընթացքում չի կիրառել իր «Իսկանդերները», հրթիռների ողջ կազմը գտնվել է երկրի զինված ուժերի պահեստներում: Այդ մասին փետրվարի 25-ին լրագրողներին հայտնել են ՌԴ Պաշտպանության նախարարությունում՝ մեկնաբանելով ՀՀ վարչապետ Նիկոլ Փաշինյանի հայտարարությունները, գրում է «ՌԻԱ Նովոստի»-ն։
ՊՆ-ում հայտարարել են, որ «տարակուսանքով եւ զարմանքով» ծանոթացել են Փաշինյանի այն հայտարարությանը, թե Լեռնային Ղարաբաղում Հայաստանի զինված ուժերի կողմից օգտագործվող «Իսկանդեր» համալիրների հրթիռները «չեն պայթել կամ պայթել են միայն 10 տոկոսով»:
«Մեր ունեցած օբյեկտիվ եւ հավաստի տեղեկությունների համաձայն, որոնք հաստատվել են այդ թվում օբյեկտիվ վերահսկողության համակարգի կողմից, այդ տիպի հրթիռային համալիրներից ոչ մեկը Լեռնային Ղարաբաղի հակամարտության ընթացքում չի կիրառվել։ Հրթիռների ողջ կազմը գտնվում է Հայաստանի Հանրապետության զինված ուժերի պահեստներում», - հայտնել են գերատեսչությունից։
«Դատելով ամենից՝ ՀՀ վարչապետ պարոն Նիկոլ Փաշինյանին մոլորության մեջ են գցել, ինչի հետևանքով նա սխալ տեղեկատվություն է օգտագործել», - ասված է հաղորդագրության մեջ:
«9կ720-է ("Իսկանդեր-Է") օպերատիվ-մարտավարական հրթիռային համալիրը փորձարկվել եւ բազմիցս հաջողությամբ կիրառվել է Սիրիայի Արաբական Հանրապետությունում միջազգային ահաբեկչական խմբավորումների դեմ մարտական պայմաններում: Դա մեզ լիովին հիմք է տալիս պնդելու, որ Ռուսաստանում արտադրվող 9Կ720-e "Իսկանդեր-Է" հրթիռային համալիրն աշխարհում լավագույնն է իր դասարանում», - ասված է հաղորդագրության մեջ:
Երեւանում հերթական քաղաքական ճգնաժամը բռնկվել է ռուսական «Իսկանդերների» մասին Փաշինյանի անզգույշ խոսքերից հետո: Հայաստանի գլխավոր շտաբի պետի տեղակալը, ըստ ԶԼՄ-ների, ծաղրել է վարչապետին, ինչի համար պաշտոնանկ է արվել: Հինգշաբթի առավոտյան ՀՀ զինված ուժերը հանդես են եկել հայտարարությամբ, որում պահանջել են Փաշինյանի հրաժարականը։
Վարչապետը դա գնահատել է որպես հեղաշրջման փորձ և կոչ արել իր կողմնակիցներին դուրս գալ փողոց։ Մինչդեռ ընդդիմությունը բարիկադներ է կառուցել և խորհրդարանի մոտ վրանային ճամբար տեղակայել, նրանք տրամադրված չեն իշխանության հետ բանակցելու և պահանջում են վարչապետի հրաժարականը։
