Պուտինն ու Մակրոնը քննարկել են Ղարաբաղի հարցով Մոսկվայում կայանալիք բանակցությունները

Ռուսաստանի և Ֆրանսիայի նախագահներ Վլադիմիր Պուտինը և Էմանուել Մակրոնը հեռախոսազրույցի ընթացքում քննարկել են Ռուսաստանի, Ադրբեջանի և Հայաստանի ղեկավարների եռակողմ հանդիպումը, որը նախատեսված է անցկացնել Մոսկվայում այսօր՝ հունվարի 11-ին:

Այս մասին հունվարի 10-ին հայտնել է Կրեմլի մամուլի ծառայությունը:

Բանակցությունների ընթացքում Մակրոնն իր աջակցությունն է հայտնել Լեռնային Ղարաբաղի կարգավորման գործընթացին նպաստելու Ռուսաստանի ջանքերին:

Կողմերն ընդգծել են բախումներից տուժած բնակչությանը հրատապ մարդասիրական օգնության տրամադրման կարևորությունը, այդ թվում՝ միջազգային մասնագիտացված կազմակերպությունների միջոցով: