Ինքն է դավադիր երկրի համար. Վիտալի Բալասանյանը՝ Փաշինյանի մասին

Կարող ենք փաստել, որ տավուշյան դեպքերից հետո ՀՀ քաղաքական իշխանությունը Հայաստանը ներքաշել է պատերազմական իրավիճակի մեջ, որը շատ վտանգավոր է: Այս մասին լրագրողների հետ ճեպազրույցում այսօր հայտարարել է Արցախի հերոս, գեներալ Վիտալի Բալասանյանը:

Նրա խոսքով, նախկին իշխանությունների օրոք ղարաբաղյան հարցում Հայաստանը երբևէ չի եղել հակամարտող կողմ.

«Հայաստանը եղել է միջնորդ, բանակցությունների երաշխավոր, բայց հիմա իշխանությունները Հայաստանը ներքաշել են հակամարտության մեջ», - նշեց նա։

Մեկնաբանելով վարչապետ Նիկոլ Փաշինյանի այն հայտարարությունը, թե Արցախում կան դավադիր ուժեր, որոնք պատերազմի են ձգտում, Բալասանյանն արձագանքեց՝ այդ հայտարարությունն անողն է դավադիր.

«Ես համոզված եմ, որ դավադիրն ինքն է երկրի համար: Ժամանակները ցույց կտան, որ համար մեկ դավադիրն այդ հայտարարությունն անողն է»,- հավելեց նա:

Նա նաև ասաց, որ Փաշինյանը ինքը պետք է հեռանա, առանց սպասելու, որ բողոքի ալիք բարձրանա: