Երկու լիբանանահայ բժիշկների ընտանիքներ բնակության են տեղափոխվել Արցախ

Երկու լիբանանահայ բժիշկների ընտանիքներ բնակության են տեղափոխվել Արցախ՝ Շուշի քաղաք: Այդ մասին հայտնում է ՀՀ Սփյուռքի գլխավոր հանձնակատարի ֆեյսբուքյան էջը:

Նշվում է, որ Արցախը շարունակում է լիբանանահայության կողքին լինել: «Բեյրութի աղետալի պայթյունից հետ Արցախը ոչ միայն հումանիտար օգնություն ուղարկեց Լիբանան, այլև շարունակաբար իրականացնում է հանգանակություն լիբանանահայության կարիքների համար: Համայնքին հատկացվել է 25 մլն ՀՀ դրամ:

Միևնույն ժամանակ Արցախի իշխանությունները բազմիցս հայտարարել են, որ պատրաստակամ են 100-150 հայրենադարձ ընտանիքներ ընդունել», - ասված է հաղորդագրությունում:

Նշվում է նաև, որ Լիբանանի հայ համայնքին վերաբերող հարցերը Սփյուռքի գլխավոր հանձնակատար Զարեհ Սինանյանը տեսակապի միջոցով քննարկել է Արցախի նախագահ Արայիկ Հարությունյանի հետ:

«Արցախի նախագահն անդրադարձել է Լիբանանում ստեղծված իրավիճակին և ընդգծել, որ տեղի հայ համայնքի խնդիրների լուծման գործում շատ կարևոր է գործադրվող համահայկական ջանքերի համատեղումը:

Նախագահ Հարությունյանի խոսքով՝ ստեղծված դժվարությունների արագ հաղթահարումն օրախնդիր է, որպեսզի հայկական համայնքը շարունակի իր բնականոն կյանքը, բայց եթե ընտանիքներ կան, որոնք ցանկություն ունեն տեղափոխվել, գերադասելի է, որպեսզի հայրենիք վերադառնան: Այդ համատեքստում նախագահը խոսել է ԱՀ կառավարության ձեռնարկումներից:

Գլխավոր հանձնակատար Զարեհ Սինանյանը նշել է, որ իր շոշափելի մասնակցությամբ Արցախը ցույց տվեց, որ լիովին կիսում է համահայկական խնդիրների ծանրությունը, և հույս հայտնեց, որ Հայաստան ժամանող լիբանանահայերի մի մասը կնախընտրի բնակվել հենց Արցախում», - ասված է հաղորդագրության մեջ: