Ռոմանոս Պետրոսյանը կոչ է արել որսի սիրահարներին դրսևորել գիտակից վարք

Շրջակա միջավայրի նախարար Ռոմանոս Պետրոսյանն ֆեյսբուքյան իր էջում լուսանկար է հրապարակել՝ կոչ անելով որսի սիրահարներին դրսևորել գիտակից վարք:

«Լուսանկարում բեզոարյան այծի ձագերն են Խոսրովի անտառում

- Տեսակը գրանցված է եղել նախկին ԽՍՀՄ կարմիր գրքում: 1996 թ-ից գրանցված է ԲՊՄՄ կարմիր ցուցակում «խոցելի»՝ Vulnerable կարգավիճակով:

- Ներկա պահին բեզոարյան այծի թվաքանակը Հայաստանում կազմում է 1000–1500 առանձնյակ:

- Բեզոարյան այծերի տեսակի արեալը ներառում է Սեւանի լեռնաշղթան (գ. Շորժայի շրջակայքերը), Գեղամա լեռնաշղթայի արեւմտյան լանջերը («Խոսրովի անտառ» արգելոց), Գառնիի, Ուրծի, Վարդենիսի, Վայոց ձորի, Զանգեզուրի, Բարգուշատի, Մեղրու լեռնաշղթաները եւ Նորավանքի կիրճը: Մեկուսացած խմբերը պահպանվել են Խուստուպ լեռան վրա, գ. Որոտանի կիրճում, գ. Արփայի հովտի վերին մասում: Փամբակի լեռնաշղթայում եւ Արագածի վրա տեսակն ամբողջովին անհետացել է:

Սիրելի հայրենակիցնե՛ր, Հայաստանի կենդանական աշխարհի շատ տեսակներ վտանգված են եւ գրանցված միջազգային ու հայկական կարմիր գրքերում:

ՀՀ որսորդական հասարակական կազմակերպություններին եւ պարզապես որսի սիրահար մեր քաղաքացիներին հորդորում եմ դրսեւորել գիտակից վարք եւ ներդրում ունենալ տարածաշրջանի կենսաբազմազանության պահպանության եւ վերականգնման գործում։

Շրջակա միջավայրի նկատմամբ հոգատար վերաբերմունքը պետք է դառնա մեր առօրյա կյանքի ու գործունեության անքակտելի մասը։ Մենք պարտավորված ենք հաջորդ սերունդներին փոխանցել անխաթար բնաշխարհ», - ասված է նրա գրառման մեջ։