Թուրքիան փերձում է իր ապակայունացնող քաղաքականությունը պորեկտել Հարավային Կովկասի վրա, որին մեքն դիմակայում ենք բոլոր հնարավոր միջոցներով: Այդ մասին «Հեռանկար» հաղորդաշարին տված հարցազրույցում ասել է ՀՀ ԱԳ նախարար Զոհրաբ Մնացականյանը՝ մեկնաբանելով Թուրքիայի միակողմանի և կտրուկ հայտարարությունները հուլիսիան Տավուշի սահմանաագծին հայ-ադրբեջանական մարտերի ժամանակ:
«Իրապես, Թուրքիայի դիրքավորումն այս զարգացումների լույսի ներքո արտահայտում է Թուրքիայի՝ այս շրջանում ձևավորված ապակառուցողական և ապակայունացնող քաղաքականությունը, որին մենք ականատես ենք եղել և շարունակում ենք ականատես լինել Արևելյան Միջերկրականում, Հյուսիսային Աֆրիկայում, Մերձավոր Արևելքում», - ասել է Մնացականյանը:
Նրա խոսքով, այն, ինչ տեղի էր ունենում հուլիսի 12-ից հետո, նպատակ ունի արտահանելու այդ ապակայունացնող քաղաքականությունը Հարավային Կովկասում, որն անընդունելի է, որին «մենք դիմակայում ենք բոլոր հնարավոր միջոցներով և դիմակայելու ենք այն առումներով, որ Հարավային Կովկասի ապակայունացման որևէ փորձ տարածաշրջանի հարևանի կողմից մեզ համար անընդունելի է լինելու»:
«Մենք այդ առումով օգտագործում ենք մեր ձեռքում եղած բոլոր հնարավոր գործիքները՝ թե՛ ազգային, թե՛ միջազգային մեր բոլոր ձևաչափերի ակտիվացման միջոցով», - ասել է նա:
Նրա խոսքով, հուլիսյան մարտերից հետո Բաքվից լսվող հեռտորաբանությունը «շատ տպավորիչ չէ», որովհետև հուլիսի 12-ից հետո առավել քան հստակ ի ցույց դրվեց, որ սպառնալիքի լեզուն, սպառնալիքի մեթոդը թե՛ հռետորաբանության մեջ, թե՛ գործողությունների մեջ Հայաստանի և Արցախի վրա չեն ազդում:
«Սա մերժված է բոլոր առումներով, և նման հռետորաբանությունը պատիվ չի բերում մեր ամբողջ տարածաշրջանին. սա հռետորաբանություն է, որն ավելի սազական է «թաղային հաշիվ» մաքրելու ինչ-որ մի գործընթացի», - ասել է նա՝ հավելելով, որ սպառնալիքի լեզուն չի ազդում, չի աշխատում:
«Սա եղել է մեր դիրքորոշումն անցած երկու տարվա ընթացքում, առավել քան հստակ, շարունակական արտահայտվել է քաղաքական դաշտում, դիվանագիտական դաշտում և արտահայտվել է հուլիսի 12-ից սկսած», - նկատել է նա:
Շարունակելով Թուրքիայի թեման՝ Մնացականյանն անդրադարձել է այն հարցին, թե ինչու Հայաստանը Եվրոպայում սովորական զինված ուժերի մասին պայմանագրի և Վիեննայի փաստաթղթի շրջանակներում կասեցրել Թուրքիայի կողմից իր տարածք տեսչական այցերը։
«Դա մեր համաչափ արձագանքն էր այն գործողություններին, որ իրականացնում են այսօր Թուրքիան և Ադրբեջանը միասին՝ նախաձեռնելով և իրականացնելով այս ռազմական վարժությունները, որոնք տեղի են ունենում այն ժամանակ, երբ և՛ միջազգային հանրության, և՛ համանախագահների, մեր ամբողջ ռեսուրսը ներդրվում է դե-էսկալացիայի ամրապնդման վրա։ Սա, իհարկե, անընդունելի է», - ասել է նախարարը։
Նրա խոսքով, ԵՍԶՈՒ-ի և Վիեննայի փաստաթղթից բխող ռազմական ստուգումներն իրենց մեջ պարունակում են շատ էական գործիք։
«Դա գործիք է փոխվստահության ձևավորման և գործիք է անվտանգային շահերի հավասար, փոխադարձ հարգանքի։ Այն, ինչ անում է Թուրքիան, բնականաբար, ի ցույց չի դնում նման փոխադարձ հարգանք, և սա հավասարազոր պատասխան քայլն էր Հայաստանի կողմից» , -նկատել է նա՝ հավելելով, որ դա Հայաստանի պատասխանն է թուրք-ադրբեջանական զորավարժություններին:
