Լավրովն Արա Աբրահամյանի հետ քննարկել է հայ-ադրբեջանական սահմանին սրված իրավիճակը

Ռուսաստանի ԱԳ նախարար Սերգեյ Լավրովը Ռուսաստանի հայերի միության (ՌՀՄ) նախագահ Արա Աբրահամյանի հետ քննարկել է հայ-ադրբեջանական սահմանին սրված իրավիճակը:

Ինչպես հայտնում են ՌՀՄ մամուլի ծառայությունից, Լավորվն ընդունել է Արա Աբրահամյանին հուլիսի 17-ին:

Համաձայն հաղորդագրության, Արա Աբրահամյանը նախարարին տեղեկացրել է Հայաստանի և Ադրբեջանի սահմանին մարտական գործողությունների մեկնարկի կապակցությամբ Ռուսաստանի հայերի միության վարչության նիստում ընդունված հայտարարության մասին:

Հայտարարությամբ, ինչպես նշել է Աբրահամյանը, ՌՀՄ-ն մտահոգություն հայտնում տարածաշրջանում իրավիճակի ապակայունացմանն ուղղված Ադրբեջանի և Թուրքիայի ղեկավարների սադրիչ հայտարարությունների և սպառնալիքների կապակցությամբ:

Սերգեյ Լավրովը վստահեցրել է, որ Ռուսաստանը՝ որպես տարածաշրջանում խաղաղության և անվտանգության շահագրգիռ երկիր, արդեն մի շարք քայլեր է ձեռնարկել՝ ուղղված հայ-ադրբեջանական սահմանին մարտական գործողությունների դադարեցմանը և իրավիճակի կայունացմանը: