Արցախի մուտքը միայն կորոնավիրուսի թեստի բացասական արդյունքի առկայության դեպքում. նախագահ

Արցախի նախագահ Արայիկ Հարությունյանը տեղեկացնում է, որ այսուհետ Արցախի Հանրապետություն մուտքը կարող է լինել միայն կորոնավիրուսի թեստի բացասական արդյունքի առկայության դեպքում: Ընդ որում, սահմանին կգործեն շարժական լաբորատորիաներ, որ անհրաժեշտության դեպքում հենց տեղում կատարեն rapid-թեստեր: 

«Ընդհանուր առմամբ Արցախ մուտք ու ելքը պետք է հասցվի մինիմումի, մինչև Հայաստանում չնվազեն հիվանդացության ցուցանիշները»,- Facebook-ի եթերում ասաց Արայիկ Հարությունյանը:

Բացի այս, Հարությունյանը նշեց, որ, հաշվի առնելով Հայաստանի փորձը, Արցախում այսուհետ ևս պարտադիր կդառնա դիմակ կրելու պահանջը, ինչպես նաև հուղարկավորության հետ կապված սահմանափակումներ կգործեն.

«Փորձը ցույց է տալիս, որ վարակի տարածման ամենավտանգավոր աղբյուրը հենց թաղման արարողություններն են: Մենք պետք է խստացնենք ստեղծված իրավիճակում դրանց կազմակերպման կանոնները, այլապես կունենանք ավելի մեծ թվով թաղումներ»,- հավելել է Արցախի նախագահը:

VERELQ-ը հիշեցնում է, որ ներկա դրությամբ ՀՀ-ից Արցախ սահմանը փակ է: